Almatyda 8 balanyń anasy Álima Jubaeva páterden páterge kóship kúneltýde. Balalarynyń úlkeni 16 jasta bolsa, kenjesi áli qyrqynan shyqpapty. Alaida onyń jaǵdaiyna qaramastan, páter iesi úiinen qýyp jatyr.
Kóp balaly ananyń turǵyn úi departamentinde úi kezeginde turǵanyna 5 jyldan asypty. Alaida kezegi áli jyljymai tur eken.
Eń bolmasa bir bólmeli páter surap barmaǵan jeri qalmaǵan 8 balanyń anasy endi kópshilikten kómek suraýǵa májbúr.
«Sharshadym, kútip, kútip. Konkýrstarǵa da qatysyp turamyn. Tabys kórsete almai, konkýrstan da óte almai jatyrmyn. Bir adamdai júgirip júrmin. "Jylamaǵan balaǵa emshek joq" deidi ǵoi. Qur otyrǵan joqpyn. Izdenip te júrmin. Biraq sheshimi bolmai jatyr», – deidi «Altyn alqa» iegeri Álima Jubaeva.
Álimanyń sózinshe, kólik júrgizýshi bolyp jumys isteitin otaǵasynyń 100 myń teńge tabysy kúnkóristerine jetpeidi. Tipti, olar bul aqshanyń teń jartysyna páteraqysyn tólep kelgen. Alaida páter iesi olardy úiinen qýyp jatqan kórinedi.
«Mine, osy aidyń onynda úidi bosatamyz. Biraq qaida bararymyzdy bilmeimiz. Bir kúnde on shaqty jaldamaly páterge qońyraý shalamyz. Bári bas tartady. Birden qansha balamyz bar ekenin suraidy. Segiz ekenin aitsam, olar: «Joq, balańyz kóp eken», – dep jaýap beredi», – deidi Álima.
Kópbalaly ana endigi ákimdik baspana máselesin sheship bermese, Bas prokýratýraǵa shaǵymdanýǵa niettenip otyr.
