Almatyda 2021-2025 jyldarǵa arnalǵan turǵyn úi qoryn jańartý baǵdarlamasy bastaldy, onyń aiasynda 708 eski úidi buzý jáne 683 turǵyn úi salý josparda, dep habarlaidy "Ult aqparat".
«Qalada eski ǵimarattar adamdardyń ómirine jáne densaýlyǵyna qaýip tóndiredi. Turǵyn úi qoryn jańartý baǵdarlamasy eski úilerdiń ornyna jańa fýnktsionaldy jáne zamanaýi nysandar salýǵa múmkindik beredi. Sonymen birge, buzylǵan tozyǵy jetken úilerdiń aýmaǵynda turǵyn úiler ǵana emes, halyqqa jańa qyzmet kórsetý nysandary salynady, jańa jeliler tartylady, saiabaqtar, býlvarlar, alańdar, qoǵamdyq oryndar paida bolady», - dep habarlady «Almaty» ÁKK.
Buǵan deiin 2012-2015 jyldarǵa arnalǵan Almaty qalasynda apatty úilerdi buzýdyń pilottyq baǵdarlamasyna sáikes, 56 eski úi súrilip, 63 kóppáterli turǵyn úi salynǵan bolatyn. Osy baǵdarlamanyń arqasynda 579 otbasy jańa páterge qonystandy.
Baǵdarlamadaǵy eski úilerdiń tizimi apatty baspana turǵyndarynyń aýdandyq ákimdikterine jii júginýi negizinde quryldy.
Baǵdarlamanyń operatory - «Almaty» áleýmettik-kásipkerlik korporatsiiasy» AQ.
Baǵdarlamada júzege asyrý mehanizminiń eki nusqasy qarastyrylǵan:
- «Almaty» ÁKK jáne jeke investor júzege asyratyn jobalar;
- memlekettik qarjylandyrý arqyly júzege asyrylatyn jobalar.
Sondai-aq baǵdarlamada Almaty qalasynyń ár aýdanynda tozyǵy jetken úilerdi buzý jáne jańa úiler salý kórsetilgen.
Almatyda turǵyn úi qoryn jańartýdyń 2021-2025 jyldarǵa arnalǵan baǵdarlamasy ÁKK saitynda ornalastyrylǵan.
