Foto. jcomp/ Freepik
Oqý-aǵartý ministrliginiń Balalar quqyǵyn qorǵaý komiteti Almatydaǵy halyqaralyq mektepte oryn alǵan jaǵdaiǵa bailanysty málimdeme jasady, - dep habarlaidy "Ult aqparat".
"Atalǵan fakt boiynsha qylmystyq is qozǵaldy. Oqiǵa Komitet pen quqyq qorǵaý organdarynyń baqylaýynda. Balalardyń quqyqtaryn qorǵaý komitetiniń tóraǵasy zardap shekken balanyń anasymen jáne halyqaralyq mekteptiń basshylyǵymen bailanysta. Balanyń otbasyna kómek usynyldy", - delingen habarlamada.
Komitet BAQ ókilderinen jariialaǵan árbir aqparatqa barynsha jaýapkershilikpen qaraýdy surady.
"Bizge bala týraly derekterdiń qupiialyǵyn saqtaý jáne ony qoǵamda taratpaý mańyzdy. Osylaisha qiyn jaǵdaiǵa tap bolǵan bala men otbasynyń tynyshtyǵyn qamtamasyz ete alamyz", - delingen habarlamada.
Eske sala keteiik, oqiǵa týraly jábirlenýshi balanyń anasy habarlaǵan bolatyn. Áiel jeti jasar balaǵa ne bolǵanyn egjei-tegjeili aityp, video túsirgen.
