Almatyda 589 177 adamnyń járdemaqysy 1 sáýirden bastap 5 %-ǵa ósti. Bul týraly Eńbek, áleýmettik qorǵaý jáne kóshi-qon komiteti Almaty departamentiniń basshysy Aidynjan Narmatov aitty, dep habarlaidy QazAqparat.
«QR Prezidenti Q.Toqaevtyń zeinetaqy men memlekettik járdemaqyny jyldyq mándegi 10 paiyzǵa indeksatsiialaý týraly tapsyrmasyn oryndaý jáne QR 2020-2022 jyldarǵa arnalǵan «QR Respýblikalyq biýdjet týraly zańyna ózgerister men tolyqtyrýlar engizý týraly» Zańy sheńberinde 2020 jyldyń 1 sáýirinen bastap ailyq eseptik kórsetkish – 2 778 tg boldy. Sáikesinshe, eń tómengi zeinetaqy 40441 teńge, bazalyq zeinetaqy tóleminiń eń tómengi mólsheri - 17 641 teńge, eń tómengi kúnkóris mólsheri - 32 668 teńge, eń tómengi jalaqy mólsheri 42500 teńge boldy. Almaty boiynsha 589 177 adamnyń járdemaqysy men zeinetaqysy jyldyq máninde 10 paiyzǵa ósetin boldy. Onyń 230 myńy jasyna qarai zeinetaqy alatyn adamdar. Qalǵany múgedek bala baǵyp otyrǵandar, asyraýshysynan airylǵan adamdar, kópbalaly otbasylar, múgedekter. Osy azamattardyń barlyǵy jyldyq mándegi 10 %-ǵa qosymsha ústemeaqy alatyn boldy. Bizde olardyń tizimderi bar», - dedi Aidynjan Narmatov onlain brifing barysynda.
Onyń aitýynsha, ústemeaqyǵa qol jetkizý úshin esh jaqqa barýdyń keregi joq. Tiisti tulǵalarǵa avtomatty túrde kóteriletin bolady.
«Kóterilgen zeinetaqy men járdemaqyny turǵyndar mamyr aiynda alatyn bolady»,- dedi A.Narmatov.
Onyń aitýynsha, 2020 jyldyń 1 qańtarynan bastap zeinetaqy men járdemaqy 5 %-ǵa ósken bolatyn. Endi 1 sáýirden bastap taǵy 5 %-ǵa kóterilip jatyr. Sonda zeinetaqy men járdemaqy mólsheri jyldyq máninde 10 %-ǵa ósip otyr.
