Almatyda biyl 240 jas muǵalim páter alyp, taǵy 500 muǵalim 30 mln teńgeden asa áleýmettik tólem aldy, dep habarlaidy "Ult aqparat".
Bul málimetti qalalyq Bilim berý basqarmasy basshysy Lázzat Jylqybaeva QR BǴM ókilderimen ótken apparattyq jiynda keltirdi.
Basqarma basshysy 2020-2025 jyldarǵa arnalǵan bilim berý baǵdarlamasyn usyndy.
«Biz úshinshi jyl qatarynan pedagogikalyq JOO támamdaǵan jas muǵalimderge 20 AEK mólsherinde bir rettik tólem tóleimiz. Bul jumys ary qarai jalǵasatyn bolady», - dedi ol.
Onyń aitýynsha, qalada 500 jas muǵalimge 30 mln teńgeden astam tólem tólengen.
Odan bólek Almatyda muǵalimder úshin baspana máselesi óte ózekti bolyp tur.
«Osyǵan bailanysty biyl Almaty jastary 3:0 baǵdarlamasy aiasynda 240 muǵalimge baspana berildi. Negizi biyl muǵalimderge 310 páter bólingen. Shart boiynsha 13 mln teńgege deiin nesie alýǵa bolady. Muǵalimderge qalada turý shart emes. Bul baǵdarlamaǵa kez kelgen muǵalim qatysa alady», - dedi ol.
Lázzat Jylqybaeva «Úzdik pedagog» baiqaý týraly da aityp berdi.
«Baiqaý jeńimpazdary 1 mln teńgege deiin grant, kólik, 2 bólmeli páter utyp ala alady», - dedi spiker.
Odan bólek taǵy 10 muǵalim árqaisysy 2 mln teńgeden Almaty ákiminiń arnaiy grantyn aldy.
