Foto: Almaty ákimdigi
Almatyda «Chempiondyq Rýh» atty qalalyq sporttyq joba ótti. Aktsiia aiasynda 225 bilim berý uiymynyń 50 myńnan astam oqýshysy men stýdenti mektepteri men kolledjderiniń sport alańdarynda bir ýaqytta jappai tańǵy jattyǵý jasady. Bul týraly Almaty qalasy Bilim basqarmasynyń ókilderi habarlady.
Atalǵan bastama «Jastar Rýhy» jastar qanaty jáne AMANAT partiiasymen, sondai-aq Politsiia departamentiniń esirtki qylmysyna qarsy is-qimyl basqarmasymen birlesip, Sport basqarmasynyń qoldaýymen júzege asyryldy.
Joba salaýatty ómir saltyn nasihattaýǵa jáne «Zań men tártip», «Taza Qazaqstan» jalpyulttyq bastamalaryn qoldaýǵa baǵyttalǵan.
Is-sharanyń ortalyq alańy qalalyq stadion boldy. Munda oqýshylar, sportshylar jáne túrli uiymdardyń ókilderi jinalyp, birlesken jattyǵýlar men taqyryptyq is-sharalarǵa qatysty.
«Bul jastarmen júrgizilip jatqan júieli jumystyń bir bóligi. Biz salaýatty ómir salty mádenietin qalyptastyrýdy, durys qundylyqtardy dáripteýdi jáne esirtkige qarsy turaqty immýnitet qalyptastyrýdy kózdeimiz. Osyndai bastamalar komandalyq rýhty nyǵaityp, sportqa degen qyzyǵýshylyqty arttyrady», – dedi Almaty qalasy Bilim basqarmasynyń Dene shynyqtyrý jáne sport ortalyǵynyń direktory Baqtiiar Elemesov.
Mundai jobalardy damytý jumystary aldaǵy ýaqytta da jalǵasyp, qatysýshylar sany artady.
