Foto: Polisia.kz
21 jastaǵy almatylyq jigit talapkerlerge joǵary oqý oryndary men áskeri kafedraǵa túsýge kómektesemin dep bes million teńgeden astam aqsha iemdengen, - dep habarlaidy "Ult aqparat" Polisia.kz saityna silteme jasap.
"Bul joly bizdiń bólimsheniń kriminaldyq politsiia qyzmetkerleri 21 jastaǵy K. esimdi er adamdy ustady. Jas jáne kópshil "maman" aldaý jáne senimge kirý arqyly qarapaiym baiýdyń tizbegin oilap taýyp, qala turǵyndarynyń aqshasyn iemdendi. Qaskói talapkerlerdiń ózderinen jáne ata-anasynan aldyn ala aqsha alyp, ýniversitetke túsý kezinde olarǵa kez kelgen kómek kórsete alatynyn aityp sendirdi. Biraq aram oiymen aldyn ala tólemdi alǵan soń, jasyrynyp qalatyn. Aldyn ala boljam boiynsha, kúdikti 5 million teńgeden astam qarjyny iemdengen", - dedi Bostandyq aýdandyq politsiia basqarmasynyń bastyǵy Maqsat Qanapiiaev.
Qazirgi ýaqytta PB-nyń óndirisinde QR QK-niń 190-baby 3-bóligi boiynsha osyǵan uqsas toǵyz epizod tergelip jatyr. Kúdiktige qatysty ýaqytsha ustaý izoliatoryna qamaý túrindegi bultartpaý sharasy tańdalǵan.
QR QPK-niń 201-babyna sáikes ózge aqparattar tergeý múddesine orai jariialaýǵa jatpaidy. QR Konstitýtsiiasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáikes, zańdy kúshine engen sot úkimimen belgilengenge deiin árbir adam qylmystyq quqyq buzýshylyq jasaýda kinásiz dep tanylady.
