Foto: rock-n-dom.ru
Sybailas jemqorlyqqa qarsy qyzmet Almaty qalasynyń jer qatynastary salasyndaǵy júieli zańbuzýshylyq faktileri boiynsha qylmystyq isterdi tergeýdi jalǵastyryp jatyr, dep habarlaidy "Ult aqparat" agenttiktiń baspasóz qyzmetine silteme jasap.
Antikor málimetinshe, memleket qajettiligi úshin ákimshilik tarapynan jer ýchaskesin satyp alǵany úshin jeke basyna 45 mln teńge somasynda para alǵan qalalyq jer qatynastary basqarmasy basshysynyń mindetin atqarýshyǵa qatysty sotqa deiingi tergeý bastalǵan. Ol sot sanktsiiasymen qamaýǵa alynǵan.
"Sonymen qatar tergeý osy basqarmanyń laýazymdy tulǵalary affiliirlengen baǵalaýshynyń kómegimen jeke jer ieleriniń múddesi úshin memlekettik satyp alýǵa jatatyn 8 ýchaskeniń qunyn negizsiz kótergenin anyqtady. Nátijesinde memleket osy ýchaskelerdiń ielerine shamamen 7,5 mlrd teńge artyq tólegen.
Bul rette baǵalaýshynyń bir nysan úshin kórsetiletin qyzmetteriniń quny 2021 jyly ortasha eseppen 68 teńgeni jáne 2022 jyly 10 teńgeni quraǵan.
Sonymen qatar, qoldanystaǵy zańnamany óreskel buzý Almaty qalasy Qalalyq josparlaý jáne ýrbanistika basqarmasynyń qyzmetinde de anyqtaldy" - delingen habarlamada.
Basqarmanyń laýazymdy adamdary memleket múddesine qaishy, jeke turǵyn úi qurylysyna arnalǵan ýchaskelerde kommertsiialyq maqsatta 11 kóppáterli turǵyn úi kesheniniń qurylysyn keliskeni belgili bolǵan.
"Nátijesinde memleketke atalǵan jer ýchaskeleriniń jalpy somasy 760 mln teńgeden astam tólenbegen kadastrlyq quny túrinde zalal keltirildi. Barlyǵy 470-ten astam jer ýchaskesi tekserýmen qamtyldy.
Jer qatynastary salasyndaǵy júieli jemqorlyqty anyqtaý jáne jolyn kesý jumystary jalǵasyp jatyr. Tergeý múddesi úshin ózge aqparat jariia etýge jatpaidy" - delingen Antikor habarlamasynda.
Konstitýtsiianyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árbir adam kinásiz dep esepteledi.
