Qazaqstan rieltorlary birikken qaýymdastyǵynyń prezidenti Larisa Stepanenko Almatyda 4 milliard teńgege (11,4 million dollar) satylyp jatqan záýlim sarai týraly habarlandyrýǵa qatysty túsinikteme berdi, dep jazady Sputnik Qazaqstan.
Stepanenko atalǵan sarai kóz qyzyqtyrsa da, Qazaqstannyń jyljymaityn múlik naryǵynda mundai úilerdiń talaiy baryn atap ótti. Naryqta bul záýlim saraiǵa uqsaityn úilerdi jii kezdestirýge bolady – qyzyqty dizainy, ornalasqan orny men tartymdylyǵy olardy erekshelep turady. Satyp alýshylar tabiǵat aiasynda ornalasqan saltanatty úilerdi Medeý aýdanynan taba alady.
"Bul nysanǵa qatysty aitar bolsam: qymbat jihazdarmen jabdyqtalǵany kórinip tur, meniń tájiribemde záýlim sarailar kezdesken. Biraq ornalasqan orny baǵasyna biraz sáikes kelmeidi. Qansha jerden sándi, záýlim úi bolǵanmen, Naýryzbai aýdany úshin edáýir qymbat baǵa", — dedi Stepanenko.
Sarapshy bul Qazaqstannyń jyljymaityn múlik naryǵyndaǵy rekordtyq baǵa ma degen suraqqa jaýap berýge qinaldy.
"Biz habarlandyrýdyń barlyǵyn zerdelep, taldaý jasai almaimyz. Onyń ústine mundai sarailardyń kóbisi jabyq túrde satylady. Sondyqtan Qazaqstan naryǵy úshin qanshalyqty rekordtyq baǵa ekenin aita almaimyn", — dedi ol.
Buǵan deiin Krysha saitynda Almatydaǵy Qalqaman-1 shaǵyn aýdanynda záýlim sarai satylatyny týraly habarlandyrý shyqqan edi. Úide SPA-aimaq, kinoteatr, personalǵa arnalǵan orynjai men asúi, bassein, sondai-aq jeke tennis korty bar. Sarai ortalyqtandyrylǵan avtomatty jylý júiesi jáne ventiliatsiiamen jabdyqtalǵan. Kirpish úi 2017 jyly salynypty, on bólmesi bar.
Aita ketsek, dál osy baǵaǵa Amerikanyń Maiami-Bich qalasynan teńiz jaǵasynda ornalasqan alty jatyn bólmesi men jeti jýynatyn bólmesi, basseini bar záýlim sarai satyp alýǵa bolady.
