Almaty qalasy ákiminiń orynbasary Saparbek Tuiaqbaev onlain brifing barysynda 4 mamyrdan bastap jumys isteýine ruqsat etiletin bizneske qandai talaptar qoiylatynyn aitty, dep habarlaidy QazAqparat.
QR Prezidenti janyndaǵy TJ rejimin qamtamasyz etý jónindegi memlekettik komissiia Almaty qalasynda kásiporyndardyń qyzmetin jalǵastyrýdyń úshinshi kezeńin iske qosýdy maquldaǵan bolatyn.
Osylaisha 4 mamyrdan bastap shashtarazdar (aldyn-ala jazylý boiynsha), fotosalondar men gúl dúńgirshekteri, jyljymaityn múlik kompaniialary, aiyrbastaý pýnktteri jumysyn qaita bastaidy.
Qyzmet kórsetý salasy boiynsha aiaq kiim jóndeý, himiialyq tazalaý, baspa isi boiynsha nysandardyń jumysyn iske qosýǵa ruqsat etilgen.
Sondai-aq, jumys kestesi saǵat 17:00-ge deiin, alańy 500 sharshy metrge deiin jeke turǵan azyq-túlik satpaityn (Saýda ortalyqtary, saýda oiyn saýyq ortalyǵy, saýda úileri kirmeidi) dúkenderdiń qyzmetine ruqsat berildi.
Osy kásiporyndar Almaty qalasynyń Bas memlekettik sanitarlyq dárigeriniń «3-shi kezeńniń jekelegen salalarynyń nysandary qyzmetine shekteýlerdi alyp tastaý tártibi týraly» qaýlysynda jazylǵan sanitarlyq-epidemiologiialyq normalardy saqtaýǵa mindetteledi.
Olar algoritmdi oryndaǵan jaǵdaida ǵana qyzmetin jalǵastyrýǵa ruqsat etiledi.
«Algoritm birneshe kezeńnen turady. Birinshiden, Almaty qalasy Bas memlekettik sanitarlyq dárigeriniń «3-kezeńniń jekelegen salalarynyń nysandary qyzmetine shekteý qoiý tártibi týraly» qaýlysymen (budan ári - qaýly) tanysý kerek. Ekinshiden, qaýlynyń talaptaryna sáikes nysandardy daiyndaýǵa tiisti. Úshinshiden, daiyndaý protsesi aiaqtalǵannan keiin - infoalmaty.kz saitynda tirkelip, nysannyń qaýly talaptaryna sáikes daiyndalǵanyn rastap, elektrondyq tsifrlyq qoltańbamen habarlamaǵa qol qoiý arqyly kepildik beredi», - dedi Saparbek Tuiaqbaev.
Ótinimdi qabyldaý erteń tańǵy saǵat 09.00-den bastalady.
