Elimizdegi restorandar qyzmetkerleriniń sanyn jasyryp, kassa apparattaryn qoldanbaityn nemese fiskaldyq chekti aiyna 1 ret shyǵaryp, óz kirisin kórsetpegen, dep habarlaidy "Ult aqparat" Memlekettik kirister komitetiniń baspasóz qyzmetine silteme jasap.
Memleket shaǵyn kásipkerlik sýbektilerin fiskaldy qoldaý sharalaryn jalǵastyryp kele jatqanyna qaramastan, elimizdiń meiramhanalary ózderiniń kirisin jasyrýdy jalǵastyrýda.
«Memlekettik kirister komiteti atalǵan saladaǵy salyq tóleýshilerdiń salyqtyq mindettemelerin oryndaýyn qashyqtan baqylaýdy ótkizý barysynda astanada jáne respýblikalyq mańyzy bar qalalarda qyzmetin júzege asyratyn ártúrli internet saittarda óz qyzmetin jarnamalaityn meiramhanalardyń tizimin paidalandy», - dep málimdedi QR QM Memlekettik kirister komiteti salyqtyq ádisnama departamentiniń direktory Jánibek Nurjanov.
Baqylaýdyń aldyn ala nátijesine sáikes, Nur-Sultan qalasynan 164 meiramhana boiynsha 37 salyq tóleýshi salyq esebinde óz kirisin kórsetpegen, 31 meiramhana boiynsha jaldamaly qyzmetkerler joq jáne 41 meiramhana jaldamaly qyzmetkerler sanyn 1-5 aralyǵynda dep kórsetken. Odan basqa, qalanyń 6 meiramhanasynda baqylaý - kassa mashinalary joq, al BKM ornatqan meiramhanalardyń ishinde aiyna 1 ret fiskaldyq chekti shyǵaratyn - 1 meiramhana, kúnine 1 ret - 14 meiramhana anyqtaldy. Qalanyń 34 meiramhanasynda BKM boiynsha ainalym joq.
Osyǵan uqsas jaǵdai Almaty qalasy boiynsha oryn alǵan. Iaǵni, 275 meiramhana boiynsha 95 salyq tóleýshi salyq esebinde óz kirisin kórsetpegen, 123 meiramhananyń jaldamaly qyzmetkerleri joq, 24 meiramhana jaldamaly qyzmetkerler sanyn 1-5 aralyǵynda dep kórsetken. BKM boiynsha: fiskaldyq chekti aiyna 1 ret shyǵaratyn - 3 meiramhana, kúnine 1 ret shyǵaratyn - 13 meiramhana anyqtaldy. Almaty qalasy meiramhanalarynyń 83-de BKM boiynsha ainalym bolmaǵan.
Shymkent qalasynyń 85 meiramhanasy boiynsha óz kiristerin kórsetpeitin 17 salyq tóleýshi anyqtaldy, 24 meiramhana jaldamaly qyzmetkerlerin kórsetpegen, 12 meiramhana jaldamaly qyzmetkerler sanyn 1-5 aralyǵynda dep kórsetken. Odan basqa, qalanyń 23 meiramhanasynda baqylaý - kassa mashinalary joq. BKM ornatylǵan meiramhanalar boiynsha: aiyna 1 ret fiskaldyq chekti shyǵaratyn - 2 meiramhana, kúnine 1 ret shyǵaratyn - 8 meiramhana anyqtalǵan. BKM boiynsha ainalymy joq 24 meiramhana anyqtaldy.
Bul rette Nur-Sultan, Almaty jáne Shymkent qalalary boiynsha atalǵan saladaǵy salyq tóleýshilerdiń 18 paiyzy 2018 jylǵy deklaratsiiasynda jylyna 1 mln teńgege deiin nemese kúnine 3 000 tenge mólsherinde kiris kórsetken.
«Salyq mindettemelerin tolyq kólemde oryndamaityn barlyq salyq tóleýshilerge zańbuzýshylyqtardy joiý týraly habarlama joldandy. Osyndai taldaý basqa oblystar boiynsha da júrgizilýde», - dep atap ótti Jánibek Nurjanov.
