Almatyda jasyl qordy saýyqtyrý boiynsha jumystar jalǵasýda, biyl 257 myń aǵash otyrǵyzylady, dep habarlaidy QazAqparat.
Almaty qalalyq jasyl ekonomika basqarmasynyń basshysy Natalia Livinskaianyń aitýynsha, jyl sońyna deiin 257 myń aǵash otyrǵyzý josparlanǵan. Birinshi kezekte oblysqa shekaralas ornalasqan Naýryzbai, Alataý jáne Jetisý aýdandaryna erekshe nazar aýdarylatyn bolady.
«Qalada barlyǵy 2,352 mln aǵash bar. Olardyń ishinde saýyǵyp, japyraqtaryn keńge jaiǵandary 1,8 mln nemese 76,5 paiyz. Ótken jyly qala ákimi Baqytjan Saǵyntaevtyń bastamasymen «Jasyl Almaty» aktsiiasy qolǵa alyndy. Sonyń aiasynda ótken jyly kúzde 135 myń túp aǵash otyrǵyzyldy. Biyl 8 myńǵa jýyq aǵash otyrǵyzdyq, jyl sońyna deiin taǵy 257 myń túp aǵash otyrǵyzýdy josparlap otyrmyz», – dedi onlain brifing barysynda Natalia Livinskaia.
Sonymen qatar, ol megopoliste aǵash otyrǵyzý jumystaryna jańa talaptar engizilgenin atap ótti.
«Qazir ujymdyq jáne kommertsiialyq uiymdar qaiyrymdylyq shara barysynda jii aǵash otyrǵyzady. Mine, osyndai jumystar úshin jańa ereje engizildi. Otyrǵyzylatyn aǵashtyń diametri 3 sm, biiktigi 3 metrden kem bolmaýy kerek. Taǵy bir másele aǵashty otyrǵyzýdan bólek ony kútip-baptaý jumystary bar. Jańa talapta otyrǵyzylǵan aǵashty eki jyl baptaý erejesi qarastyrylǵan. Bul jasyl jelektiń qaraýsyz qalmai, ary qarai jersinip, jaiqalyp ósip ketýi úshin jasalyp otyr. Sonymen qatar, qalada aǵash otyrǵyzatyn arnaiy aimaqtardy qarastyryp jatyrmyz», – dedi ol.
Sondai-aq, mamandar aýdandardaǵy jasyl jelekti sanap shyqan. Eń jasyl eldi meken Medeý aýdanynda 472 myńnan astam aǵash bar. Al, Naýryzbai jáne Alataý aýdandarynda shamamen 202 myń jáne 179 myń aǵash ósip tur. Jasyldandyrý boiynsha ekinshi oryndy Túrksib aýdany ielengen, munda 431,5 myń túp aǵash bar. Bostandyq aýdanynda 380 myń aǵash ósip tur. Al, Áýezov aýdanyndaǵy aǵashtar sany 100 myńǵa kem, iaǵni 255 myńǵa jýyq. Jetisý aýdanynda 220 myńnan astam, al Almaly aýdanynda 213 myń aǵash bar.
Aita keterligi, tek kópshilik qoldanatyn jerdegi aǵashtar ǵana sanaldy. Iaǵni, jeke aýmaqtardaǵy, zirattardaǵy, respýblikalyq mańyzy bar jerlerdegi jasyl jelek qosylmaǵan.
