Baqytjan Saǵyntaev Almatydaǵy 20 sáýirden bastap jumysy jandanýy tiis kásiporyndar men qurylys kompaniialarynyń basshylarymen onlain kezdesý ótkizdi, dep habarlaidy "Ult aqparat".
Jinalǵandar eń aldymen jumysshylardyń qaýipsizdigi máselelerin talqylady.
«Bul protsesti biz 20 sáýirden bastap iske qosamyz. Basty talap sanitarlyq-epidemiologiialyq qaýipsizdikti saqtaý jáne jumyskerlerdiń densaýlyǵyna qaýip tóndirmeý», – dedi ákim.
Qala basshysy bul talapty buzǵan kásiporyndarǵa TJ aiaqtalǵansha jumys isteýge tyiym salynatynyn aitty.
«Atameken» UQK, ákimdik, qalalyq Taýarlar men qyzmetterdiń sapasy men qaýipsizdigin baqylaý departamenti qyzmetkerlerinen turatyn komissiia aldaǵy 2-3 kún ishinde kásiporyndardyń daiyndyǵyn tekseredi. Basty nazar jeke qorǵanys quraldarynyń, sanitaizerlermen jabdyqtalýyna, óndiristik jáne keńse úi-jailaryn óńdeýge, kireberistegi qyzmetkerlerdiń dene qyzýyn baqylaýǵa jáne sanitarlyq qorǵaýdy qamtamasyz etýdiń basqa da sharalaryna aýdarylatyn bolady.
Jekelegen salalar boiynsha arnaiy ázirlengen hattamalarda kórsetilgen talaptarǵa sáikes kelgen kezde qyzmetke ruqsat beretin akt beriledi. Turaqty monitoring kezinde zań buzýshylyqtar anyqtalǵan jaǵdaida akt keri qaitarylyp, qyzmeti toqtatylady.
Kásiporyn basshylary jumysty jańa jaǵdaida bastaýǵa jáne óz qyzmetkerleriniń qaýipsizdigin qamtamasyz etýge daiyn ekendikterin bildirdi.
Olar ákimdik pen Jedel shtab qabyldaǵan qalanyń ekonomikalyq belsendiligin qalpyna keltirýge baǵyttalǵan sheshimderdi qoldady.
Buǵan deiin habarlanǵandai, Almatyda jumyspen qamtylǵandar sany 728 myń adamǵa qysqardy. Olardyń ishinde qarjy sektorynda, sondai-aq bilim berý, memlekettik basqarý, aqparat jáne bailanys salalarynda jumys isteitin 200 myń adam qashyqtan jumys jasaý rejimine kóshken.
20 sáýirden bastap ónerkásip kásiporyndarynyń, qurylys salasyndaǵy kompaniialardyń, qurylys materialdarynyń kóterme saýda naryǵynyń jumysyn iske qosý josparlanyp otyr. Sondai-aq, notariýstar jáne Almatynyń Naýryzbai aýdanyndaǵy HQKO-nyń bir keńsesi tek bizneske qyzmet kórsetý úshin jumys isteidi.
Osy saladaǵy kásiporyndardy iske qosý bir ai ishinde jumyspen qamtylǵan halyqtyń sanyn qosymsha 90 myń adamǵa ulǵaitýǵa múmkindik beredi.
