Almaty Týrizm basqarmasy qalalyq dizain-kod boiynsha ájethanaǵa modýlderin jasaý jáne ornatýǵa qatysty tender jariialady, dep habarlaidy "Ult aqparat".
Qalada ortalyq kárizge jáne sýmen jabdyqtaý júiesine qosylǵan 20 ájethana ornatylady. Zamanaýi ájethanalar myna jerlerge qoiylady:
Dostyq dańǵyly - 2 dana, Almaty zoobaǵynyń kireberisinde - 1 dana, Kók bazardyń qasynda - 2 dana, Memlekettik qýyrshaq teatrynda - 1 dana, «Otyrar» qonaq úiiniń janyndaǵy skverge - 1 dana, Almaty qalasynyń ortalyq meshitiniń janynda - 1 dana, Arbatta - 2 dana, Panfilov kóshesinde - 1 dana, Astana alańynda - 1 dana, ««Aerovokzal» SK - 1 dana, «Jas qanat» alańy Timiriazev pen Buqar jyraý kósheleriniń arasynda - 1, Ǵ.Músirepov atyndaǵy jastar teatry - 1, «Alataý» metro stansasy - 1, Jastar teatry - 1 , A.Baitursynov alańy - 1 , Úlken Almaty kóli – 1, Býtakov shatqaly - 1 dana.
Sonymen birge ájethana modýlderin ornalastyrýdy tapsyrys berýshiniń qalaýy boiynsha ózgertýge bolatyndyǵy naqtylanady. Olardy ornatýdyń maqsaty - Almaty qalasynyń turǵyndary men qonaqtary úshin qolaily jaǵdai jasaý.
Tehnikalyq sipattama boiynsha, esikteri metalldan jasalǵan, eki bólmeli (erler men áielderge) arnalǵan.
Ájethana aqyly. Tólemdi janynda ornalasqan terminal arqyly tóleidi.
Qazirgi ýaqytta tenderge qatysýǵa ótinimder qabyldaý jariialandy. Somasy 178,5 mln teńge.
Buǵan deiin, Almatyda dizain-kod boiynsha salynatyn ájethana eskizderi tanystyrylǵan bolatyn. Avtorlardyń aitýynsha, ájethana avtomattandyrylǵan júie boiynsha jumys isteidi. Esigi jabylǵannan keiin 15 minýt ótken soń, eskertý dybystyq dabyl qaǵylyp, ájethana esikteri avtomatty túrde ashylady.
