Búgin Almatyda Jarokov kóshesi men Ál-Farabi dańǵylynyń qiylysynda onnan astam avtokóliktiń qatysýymen iri jol apaty boldy. Oqiǵanyń videosy áleýmettik jelide tarady, dep habarlaidy QazAqparat.
Almaty qalalyq politsiia departamenti jol-kólik oqiǵasy búgin 08 saǵat 45 minýtta Almatynyń Bostandyq aýdanynda bolǵanyn habarlady.
«Jol apatynan 13 avtomobil zardap shekti. Atalǵan kólikter Jarokov kóshesiniń boiymen soltústik baǵytta kele jatyp soqtyǵysqan. Jol-kólik oqiǵasy saldarynan eki adam zardap shekti. Olar - «Toiota Prado» kóligin basqarǵan 51 jastaǵy áiel jáne «Leksýs» markaly kóliktiń jolaýshysy 12 jasar bala. Zardap shekkenderge meditsinalyq kómek kórsetildi. Bul derek boiynsha Bostandyq aýdandyq politsiia basqarmasy tergeý júrgizip jatyr. Tiisti saraptamalar taǵaiyndaldy», - dedi Almaty qalalyq PD anyqtaý basqarmasynyń bastyǵy, politsiia polkovnigi Oljas Sháripov.
