Qazaqstanda taǵy bir adam Covid-19 dertinen aiyqty. Ol - Almatydaǵy balalar infektsiialyq aýrýhanasynda jatqan 12 jasar qyz bala. Aýrýdan jazylǵan bala 28 naýryzda aýrýhanadan shyǵady. Bul týraly Densaýlyq saqtaý ministrligi habarlady.
Qazir elde barlyǵy tórt adam aýrýdan jazyldy. Osyǵan deiin Almatyda úsh adam, Nur-Sultanda bir adam aýrýhanadan shyqqan.
Elde qazir 126 adamǵa virýs juqqany anyqtaldy: Almatyda - 48 adam, Nur-Sultanda - 61 adam, Qaraǵandyda - tórt adam, Jambyl oblysynda - úsh adam, Shymkentte - eki adam, Almaty oblysynda - bir adam, Aqtóbe oblysynda - bir adam, Soltústik Qazaqstan oblysynda - bir adam, Atyraý oblysynda - úsh adam, Pavlodar oblysynda, Mańǵystaý oblysynda bir adam.
26 naýryz keshkisin Nur-Sultanda 64 jastaǵy bir áiel adam Covid-19 dertinen qaitys boldy.
27 naýryzda Pavlodar, Atyraý jáne Mańǵystaý oblysynda koronavirýs alǵash ret tirkeldi.
Qazaqstanda koronavirýsqa bailanysty 15 sáýirge deiin tótenshe jaǵdai. 19 naýryzdan bastap Almaty men Nur-Sultan qalalary karantinge kóshti.
Al 28 naýryzdan bastap eldegi iri úsh qalada - Almaty, Nur-Sultan, Shymkentte shekteýler kúsheiedi:
- Endi úsh qaladaǵy jurt jumysqa, azyq-túlik jáne dári alýǵa ǵana shyǵa alady.
- Park, jaiaý júrginshiler kóshesi, jaǵalaýlar, oiyn alańdary jabylady.
- Qoǵamdyq kólikterdiń jumysy shektele bastaidy.
- Qoǵamdyq oryndarda úsh adamnan artyq jinalýǵa bolmaidy. Bul shekteýdiń bir otbasynyń adamdaryna qatysy joq.
- Balalar eresektersiz kóshege shyǵýǵa tyiym salynady.
Ótken jyldyń sońynda Qytaida alǵash ret tirkelgeli beri álemde koronavirýs juqtyrǵanar jarty millionǵa jýyqtap qaldy. AQSh-taǵy Djon Hopkins ýniversitetiniń dereginshe, 26 naýryzda álemde virýs juqtyrǵandar 490 myńnan asty. 22 myńnan asa adam qaza bolyp, 119 myńnan astam naýqas dertten aiyqty. Dúniejúzilik densaýlyq saqtaý uiymy Covid-19 koronavirýsyn "pandemiia" dep jariialaǵan.
