Almaty ákimi Baqytjan Saǵyntaev jumys jiynyn ótkizip, megapolisti jasyldandyrý boiynsha sheberlik-jospardyń jobasyn talqylady, dep habarlaidy "Ult aqparat".
Sheberlik-josparǵa sáikes, shaharda aldaǵy úsh jylda 1 million aǵash otyrǵyzý kózdelgen. Ony jasaý kezinde Almatynyń jasyl jelekteri zertteldi jáne onyń qazirgi jaǵdaiy anyqtaldy. Bul jumysqa kásibi mamandar tartylyp, zertteý barysynda qaladaǵy jasyl jelektiń jalpy kólemi bir adamǵa shaqqanda nebári 894 ga – 4,8 sharshy metr ekeni anyqtaldy. Al 70-80-inshi jyldary bul kórsetkish 10 sharshy metrdi quraǵan. Jasyl jelektiń azaiýy qala kólemi men adam sanynyń artýyna bailanysty bolýda.
Aita keterligi, sońǵy úsh jyl ishinde 134 myńǵa jýyq aǵash otyrǵyzyldy. Biyl otyrǵyzylǵany — 140 myńǵa jýyq.
Mamandardyń aitýynsha, million aǵash pen tal-shilikti otyrǵyzýdyń tiimdiligi joǵary. Iaǵni, jasyl jelektiń arqasynda 118 mln kg ottegi paida bolady, qalany jasyldandyrý aimaǵy 5000 sharshy metrge deiin jetedi, jol jiegindegi shýdyń deńgeii 40%a, jasyl aimaqtan 1 sharshy metr radiýstaǵy shań deńgeii 75% tómendeidi.
Sonymen qatar, qalany abattandyrý deńgeii artady, demalys aimaqtary, skverler men saiabaqtar paida bolady. Munyń barlyǵy psihologiialyq ahýalǵa oń yqpal etedi jáne qalalyqtardyń ómir súrýine jaily jaǵdai jasaidy.
«Qalany jasyldandyrýdyń barlyq jumysy biryńǵai júrgizilip, aǵashtardy stihiialy túrde otyrǵyzýǵa nemese qiiýǵa bolmaidy. Sondyqtan sheberlik-jospardy ázirlep jatyrmyz», - dep atap ótti B. Saǵyntaev.
Jiynda dúkenderdiń, salondardyń jáne kásipkerliktiń basqa nysandarynyń syrtyn jaýyp turatyn aǵashtardy kesýge tyiym salynatyny basa aityldy. Qaitarma aǵashtardy otyrǵyzýǵa baqylaý kúsheitiledi jáne kesilgen aǵashtardyń ornyna otyrǵyzylatyn jasyl jelektiń sany artady.
Almaty ákimi Baqytjan Saǵyntaev sheberlik-josparyn tolyqtyrý boiynsha birqatar tapsyrmalar berdi. Onyń ishinde, pitomnikterdiń qýaty, jasyl jelekti otyrǵyzýdyń jáne olardy kútip-baptaýdyń biryńǵai ádisi men erejesi jiti nazarǵa alynýy tiis.
