Almaty zoobaǵy jańa kelbetke ie bolmaq. Nysandy qaita jańǵyrtý úshin demeýshiler 223 mln teńge aýdardy, dep habarlaidy QazAqparat tilshisi.
«Zoologiialyq baqti úlken ózgerister kútip tur. Qazirgi tańda jumys bastalyp ketti. Zoobaq basshylyǵy kúzde qar barysyn qaitarý týraly jańa baǵdarlama bastamaq. Bul ózgeristerdiń alǵashqysy ǵana», - dedi zoobaq basshysy Viacheslav Banshikov.
Qaita jańǵyrý baǵdarlamasyna qarajatty kóbinese biznesmender jiberýde.
Zoobaq direktory Viacheslav Banshikovtyń bastamasymen baq territoriiasy abattandyryla bastady. 10500 metr asfalt, 6288 metr bordiýr tóseldi. Buǵan 57 mln teńge qarajat jumsaldy. Ortalyqta quny 20 mln teńge bolatyn qurǵaq sýburqaq salý josparlanǵan. Quny 3,5 mln teńge bolatyn aspashamdar aýystyryldy. 35 kólik qara topyraq ákelindi.
Jaqyn arada zoobaqta jańa meditsinalyq pýnkt ashylady. Oǵan 3 mln teńge jumsalady. Sonymen qatar, ana men bala bólmesi jasaqtalady. Oǵan 4,4 mln teńge qarastyrylǵan. Zoobaq kelýshilerine arnalǵan demalys aýmaqtary salynyp, ol jerde tegin sý beriledi.
Zoobaqtyń injenerlik jelileri 30 jyldan beri jańartylmaǵan. Olardy aýystyrýǵa 41 mln teńge qarastyrylǵan. Odan bólek annotatsiialyq-etiketkalardy aýystyrýǵa, amfiteatr, kireberis dizainyn jetildirýge qarajat bar.
Aita ketsek, búginde zoobaqta 375 janýardan 3447 túri bar. Janýarlar 6 ekspozitsiiaǵa bólingen. Onyń ishinde Qazaqstan qyzyl kitabyna engen 25 janýar kezdesedi.
