Almatydaǵy JEO-2 stansasy kómirden gazǵa tolyǵymen 2025 jyly kóshedi. Kógildir otynmen janatyn birinshi qazandyqtar 2023 jyly shyǵa bastaidy, dep habarlaidy QazAqparat.
Joba quny shamamen 98 mlrd teńge bolmaq. Búgin ótken qoǵamdyq talqylaý barysynda osy jaiynda aityldy.
«Almatyda ekologiia máselesi ózekti. Qalanyń ekologiiasyna áser etetin faktorlardyń eń bastysy - osy JEO-2 bóletin qaldyqtar. Bir jaǵynan bul - qaladaǵy eń úlken jylý kózi, ǵimarattardyń 50 paiyzdan astamyna osy ortalyqtan jylý beriledi», - dedi «Almaty elektrostansalary» AQ basqarma tóraǵasynyń orynbasary jáne bas injeneri Ǵazii Ismuhambetov.
Onyń aitýynsha, ortalyqty modernizatsiialaýdyń 4 joly bar.
Institýt usynǵan esepteýlerdiń nátijesinde birinshi nuqsa qabyldandy. Iaǵni, kómirmen jumys isteitin qazandyqtar gazǵa aýystyrylatyn boldy. Kelisim shartqa sáikes jyl sońyna deiin institýt tehnikalyq ekonomikalyq qujattama ótkizedi.
«Biyl biz memlekettik saraptamaǵa tehnikalyq ekonomikalyq qujattama ótkizip jatyrmyz. Qurylys jumystary 2023 jyly bastalady. Sol kezde biz qazandyq agregattaryn turǵyndardy jylýdan ajyratpai-aq birtindep kóshire alamyz. Ár qazandyqty kóshirýge jarty jyl ýaqyt ketedi. Tolyq jumys 2025 jyly aiaqtalady. Joba quny - 98 mlrd teńge», - dedi spiker.
Gazii Ismuhambetov JEO-2 gazǵa kóshken jaǵdaida jylý tarifi kóteriletinin aitty.
«Tarif boiynsha Samuryq Qazyna qory men Úkimet, Almaty ákimdigi qarjylandyrý máselesin sheship jatyr. Eýraziialyq qaita qurý banki, basqa da banktermen kelissózder júrip jatyr. Osy talqylaýlardan soń ǵana naqty sandy aita alamyz», - dedi ol.
«KazNIPIEnergoprom» AQ bas injeneri Maksim Vasilevtiń aitýynsha, 98 mlrd teńge aldyn ala esepteý boiynsha shyǵarylǵan soma. Bul soma jobany júzege asyrý barysynda ózgeretin bolady.
Onyń aitýynsha, rekonstýrktsiialyq jumystardan soń aýaǵa shyǵarylatyn ziiandy qospalar 5,5 ese kemidi. Ásirese, kómirden shyǵatyn kúkirt dioksidi azaiady.
«Qazir aýa basseinine shyǵatyn qospalar jylyna 38 myń tonna bolsa, bizdiń esebimiz boiynsha 6 myń tonnaǵa azaiady», - dedi Maksim Vasilev.
