Almatydaǵy jedel járdem qyzmetkerleri basshylyqtyń sybailas jemqorlyqqa qatysy baryn jáne jumyskerlerge kórsetken qysymyn aityp shaǵymdandy, dep habarlaidy QazAqparat.
Aita keteiik, birqatar buqaralyq aqparat quraldarynda jedel járdem stantsiiasynda isteitin 75 júrgizýshi qol qoiǵan shaǵym týraly aqparat tarady.
Onda jumysqa ornalasý úshin júrgizýshiler bastyǵyna belgili bir somany tóleýi kerektigi aitylǵan.
Sonymen qatar, júrgizýshilerge arnaiy kiim berilmeitini, buzylǵan kólikterdi óz qarajaty esebinen jóndeitini jáne jańa basshy kelgeli beri koronavirýspen aýyratyn naýqastarmen jumys isteý qaýpi boiynsha ústemaqynyń aitarlyqtai tómendegeni týraly da jazylǵan.
Jedel járdem qyzmeti taraǵan aqparatqa qatysty túsinik berdi. Olardyń aitýynsha, jedel járdem qyzmetkerleri bul shaǵymdy 2 qyrkúiek kúni jazǵan.
Shaǵymda keltirilgen derekterdi Nur Otan partiiasy, Almaty ákimdigi, qalalyq qoǵamdyq densaýlyq saqtaý basqarmasymen birlesip tekserdi.
Jedel járdem qyzmetinde júrgizilgen tekserý nátijesi boiynsha júrgizýshilerdiń shaǵymy negizsiz dep tabyldy.
«Ótinishte aitylǵandar búkil qyzmetkerlerdiń pikiri emes, tek 12-shi qosalqy stantsiianyń keibir júrgizýshileriniń narazylyǵy ekenin aityp ótken jón. Bul narazylyq basshylyq tarapynan janar-jaǵarmai úshin júrgizýshilerdiń shyǵynyn baqylaýdyń kúsheiýine bailanysty shyqty. Bul tekseris biýdjet qarajatyn ai saiyn 8 361 660 teńgege únemdeýge kómektesedi. Sondai-aq jedel járdem júrgizýshileriniń qatysýymen jol-kólik oqiǵalarynyń aldyn alýǵa alyp keldi», - dep habarlady jedel járdem qyzmeti.
Vedomstvo jedel járdem júrgizýshileriniń qatysýymen 39 jol apaty bolǵanyn, onyń 19-y júrgizýshilerdiń kinásinen ekenin, ekeýi ólimmen aiaqtalǵanyn, jeteýi jaraqat alǵanyn, onyń úsheýi dáriger men bir jedel járdem júrgizýshisi ekenin atap ótti.
