«Almaty jastary 3.0»: sanat tizimi keńeiip, jeńildetilgen qaryz somasy ulǵaidy. Bul týraly qala ákimi Baqytjan Saǵyntaev jelidegi paraqshasynda jazdy, dep habarlaidy "Ult aqparat".
Ákim jeńildetilgen turǵyn úi nesiesin berý boiynsha qalalyq baǵdarlamada qandai jańalyqtar paida bolǵanyn jáne qansha ótinish túskenin habarlady.
«Ótken jyly jumys isteitin jastardy turǵyn úimen qamtamasyz etý boiynsha «Almaty jastary 3.0» biregei qalalyq baǵdarlamany ázirlep, iske qostyq. 35 jasqa deiingi myńdaǵan jas almatylyqtar 25 jylǵa deiingi merzimge jyldyq mólsherlemesi 5%-ben jeńildetilgen turǵyn úi zaemyn alý quqyǵyna ie boldy. Barlyǵy – 1 myń qaryz», - dep jazdy Saǵyntaev.
Baqytjan Saǵyntaevtyń málimetinshe, suranystyń artqany eskerilip, biyl baǵdarlama jalǵasyn tapty. Bul rette qaryz somasy 5 mln teńgeden 18 mln teńgege deiin ulǵaidy. Burynǵysha turǵyn úidi bastapqy jáne qaitalama naryqtan tańdaýǵa múmkindik bar.
Sanat tizimi de keńeitildi. Endi meditsina qyzmetkerleri, muǵalimder, JOO men ǴZI oqytýshylary men ǵylymi qyzmetkerleri, mádeniet jáne sport salasynyń qyzmetkerleri, jýrnalister, jazýshylar, halyqty áleýmettik qorǵaý salasyndaǵy qyzmetkerler siiaqty kásip ókilderimen birge quqyq qorǵaý organdarynyń qyzmetkerleri de baǵdarlamaǵa qatysý quqyǵyna ie boldy.
Biyl 10-31 naýryz aralyǵynda 9 741 ótinish kelip tústi, Onyń 3 828-i baǵdarlama talaptaryna sáikes kelmegendikten qabyldanbady.
Baǵdarlamaǵa qatysýǵa 5 913 ótinish qabyldandy. Sonyń ishinde densaýlyq saqtaý salasynyń qyzmetkerlerinen – 1 716; bilim berý – 2 356; mádeniet – 225; sport – 55; JOO jáne ǴZI qyzmetkerleri – 639; BAQ – 111; Áleýmettik sala – 57; quqyq qorǵaý organdary – 754.
Baldy eseptegennen keiin sala boiynsha eń kóp ball jinaǵan myń úmitker 15 jumys kúni ishinde «Otbasy bankke» tólem qabilettiligin rastaý úshin joldama alady. Tólem qabilettiligin rastaǵan qatysýshylar 45 jumys kúnniń ishinde bastapqy jáne qaitalama naryqta turǵyn úidi derbes tańdaýdy júzege asyrady.
Tizimdi www.almaty-zhastary.kz saitynan kórýge bolady.
