Jastardyń baspana alýyna múmkindik beretin "Almaty jastary" baǵdarlamasy 2022 jyly da jalǵasady. Bul týraly Almaty ákimi Baqytjan Saǵyntaev ortalyq kommýnikatsiialar qyzmetinde ótken brifingte aitty, dep habarlaidy Sputnik Qazaqstan.
"Almaty jastary" baǵdarlamasyn bastaǵan kezde bir jylda toqtatamyz dep josparlaǵan joqpyz. 14 milliard teńgeden bastadyq: biz 10 milliard teńge berdik, "Otbasy bank" 4 milliard teńge berdi. Biyl baǵa qymbattaǵannan keiin ony 18 milliardqa kóterdik: 14 milliard teńge ákimshilik jáne 4 milliard teńgeni "Otbasy bank" berdi", - dedi qala ákimi.
Qala ákimi baǵdarlamanyń tiimdi tusy retinde jastarǵa páterdi qalanyń kez kelgen jerinen alý múmkindigi berilgenin atap ótti.
"Byltyr jastar 1000 páter aldy, onyń ishinde 300 muǵalim, 300 dáriger, sportshylar, jýrnalister men ǵylym, mádeniet salasynyń qyzmetkerleri bar. Biyl da 1000 adam baspanaly boldy. Kelesi jyly da bul baǵdarlama jalǵasyn tabady, óte úlken suranysqa ie", - dedi Almaty ákimi.
"Almaty jastary" baǵdarlamasy
Baǵdarlamaǵa qatysýshylardyń jasy 35-ten aspaýǵa tiis, baǵdarlamaǵa ótinish berýshi men onyń otbasy múshelerinde menshik quqyǵynda turǵyn úi bolmaýy kerek.
Qatysýshynyń Almaty qalasyndaǵy resmi jumys ótili kelesidei mamandyqtarda — densaýlyq saqtaý, bilim berý, mádeniet, sport, ýniversitetter men ǵylymi-zertteý institýttary, buqaralyq aqparat quraldary jáne quqyq qorǵaý organdary siiaqty sanattarda keminde sońǵy 6 aidy quraýy kerek.
