Almaty turǵyny sottalǵan aǵasynyń qaitys bolǵanyn Qaraǵandy oblysyndaǵy AK-159/5 koloniiasyna barǵan kezde bilgen, - dep habarlaidy Tengrinews.kz.
Videoda Sáýlet Jumabekova esimdi áiel Abai aýdanyndaǵy AK-159/5 koloniiasynda jazasyn ótep jatqan aǵasyna Almatydan barǵanyn aitady. Kezdesýde ol sottalýshyǵa inisiniń qaitys bolǵanyn jetkizgisi kelgen. Biraq áieldiń sottalýshymen kezdesýge múmkindigi bolmaǵan.
Sáýlettiń aitýynsha, koloniia qyzmetkerleri oǵan aǵasy qaitys bolǵanyn, tipti jerlengenin habarlaǵan. Video keiipkeri bul týraly túk bolmaǵandai aitqanyn jetkizdi.
"Aǵamnyń jeke isinde birinshi paraqta meniń bailanys derekterim, mekenjaiym kórsetilgen. Biraq maǵan onyń qaitys bolǵany týraly habarlanǵan joq. Nege? Biz qai ǵasyrda ómir súrip jatyrmyz? Qazir túrli jolmen habarlaýǵa bolady ǵoi. Tipti soǵysta da jerleý týraly habar beriledi. Nege bulai jasaidy? Ne bolsa da adam ǵoi. Qazaqstandyqtarǵa aitarym, jazany óteý oryndarynda týystaryńyz bolsa, baryp, jaǵdaiyn jii bilip turyńyz", - deidi Saýlet videoda.
QAJQ baspasóz qyzmeti jaǵdaiǵa qatysty pikir bildirdi. Vedomstvo málimetinshe, sottalýshynyń jeke isinde olardyń derekteri kórsetilmegendikten, týystaryna habarlanbaǵan.
"Sottalýshy osy mekemege byltyr 9 aqpanynda keldi. Mekemege kelgennen keiin ol óziniń ornalasqan jeri týraly eskertýden bas tartty, jaqyn týystarynyń saýalnamalyq málimetin de usynbady. Osyǵan bailanysty sottalǵan adamnyń kenetten qaitys bolǵany týraly jaqyn týystaryn habardar etý múmkin bolmady. Mekemede jazasyn óteý kezinde sottalǵan adam telefonmen sóilesý, qysqa merzimdi jáne uzaq merzimdi kezdesýler arqyly áleýmettik bailanys ornatqan joq, sálemdemeler de alǵan joq", - dep habarlady vedomstvo ókilderi.
Sondai-aq, QAJQ sottalýshy 6 qazanda qaitys bolǵanyn habarlady. Meditsinalyq saraptama ólimniń sebebin anyqtaǵan. Er adam aterosklerotikalyq júrek aýrýynan qaitys bolǵan.
