Almaty taýlarynan qara topyraqty zańsyz tasymaldaityndar sany azaiar emes. Bul týraly onlain brifing barysynda Medeý aýdanynyń ákimi Áset Masabaev aitty, dep habarlaidy "Ult aqparat".
Aýdan ákiminiń málimetinshe, biylǵy jyldyń úsh aiynda qorshaǵan ortany qorǵaý jáne ekologiia bóliminiń qyzmetkerleri Medeý aýdanynyń tabiǵatty qorǵaý politsiiasy bólimimen birlesip «Almaty qalasynyń aýmaǵyn abattandyrý erejelerin» buzǵany úshin 2,9 mln tengege 184 hattama toltyrdy.
«Aita ketý kerek, taý bókterinen qara topyraqty zańsyz tasý faktileri áli de jalǵasýda. Munda biz ekologtarmen, blogerlermen jáne politsiia qyzmetkerlerimen birge reidter júrgizemiz», - dedi Áset Masabaev.
Sonymen qatar, ol biyl aýdanda 41 750 tal otyrǵyzý josparda ekenin tilge tiek etti.
«Aǵymdaǵy jyldyń 15 mamyryna deiin aýdan ákiminiń apparaty 360 tal otyrǵyzýdy josparlap otyr, onyń 280-i otyrǵyzyldy, jeke seriktester tarapynan 1340, onyń ishinde 860 otyrǵyzyldy jáne Almaty qalasy Jasyl ekonomika basqarmasymen – 40 050, onyń ishinde 3 myń tal otyrǵyzyldy», - dedi ol.
