Almaty qalasynyń ákimi Baqytjan Saǵyntaevtyń jaqyn jerde ornalasqan qoljetimdi meditsinalyq nysandardy ashý týraly tapsyrmasyn oryndaý aiasynda Jetisý aýdanynyń Kókmaisa shaǵynaýdanynda alǵash ret «Respýblikalyq otbasylyq-dárigerlik ortalyq» meditsinalyq pýnkti ashyldy, dep habarlaidy "Ult aqparat".
Endi Kókmaisa yqshamaýdanynyń turǵyndary tegin meditsinalyq kómektiń kepildik berilgen kólemi men mindetti meditsinalyq saqtandyrý paketi sheńberinde alǵashqy meditsinalyq-sanitarlyq, ýchaskelik dárigerdiń, sondai-aq nevropatolog, ginekolog jáne basqa da mamandardyń keńesin ala alady.
Medpýnkt túrli beiindegi konsýltatsiialyq-diagnostikalyq qyzmetter kórsetý úshin zamanaýi qural-jabdyqpen jabdyqtalǵan. Meditsinalyq pýnktte ýltradybystyq zertteýden ótýge, qajetti taldaýlardy tapsyrýǵa, emshara kabinetiniń qyzmetterin alýǵa bolady.
Shaǵynaýdan turǵyndary meditsinalyq pýnkttiń ashylýyn kópten beri suraǵan. Endi bul másele sheshildi.
«Búginde Jetisý aýdanynyń Kókmaisa shaǵynaýdanynda 10 myńnan astam adam turady. Negizgi meditsinalyq qyzmetterdi alý úshin olar avtobýspen eń jaqyn emhanaǵa barýǵa májbúr boldy, bul ásirese aǵa býyn ókilderine keide yńǵaisyzdyq týdyrdy. Biraq qazir bul másele sheshildi, óitkeni respýblikalyq otbasylyq-dárigerlik ortalyqtyń meditsinalyq pýnkti ashyldy. Olar óz qarajatyna jóndeý jumystaryn júrgizip, medpýnkti eń qajetti jabdyqtarmen jabdyqtady. Medpýnkttiń ashylýy shaǵynaýdan turǵyndary úshin kópten kútken qýanyshty oqiǵa. Qoljetimdi jerde ornalasqan meditsinalyq nysandardy ashý boiynsha osy jumysty ári qarai jalǵastyramyz», — dedi Jetisý aýdany ákiminiń mindetin atqarýshy Damir Ákejanov.
