Almaty saiabaǵynda qyrylǵan kepterler ýlanǵan bolýy múmkin.
Bul týraly QR Ekologiia, geologiia jáne tabiǵi resýrstar ministrliginiń Orman sharýashylyǵy jáne janýarlar álemi komitetiniń baspasóz hatshysy Sáken Dildahmet málimdedi, dep habarlaidy "Ult aqparat".
Kepterlerdiń jappai ólimin qala turǵyndary áleýmettik jelide jariialaǵan bolatyn. Oqiǵa 28 panfilovshylar parkinde bolǵan.
«Búgin, iaǵni 26 naýryzda Almatydaǵy 28 Panfilovshylar parkinde kepterlerdiń qyrylýyna bailanysty Orman sharýashylyǵy jáne janýarlar álemi komitetiniń oblystyq inspektsiiasy men QR AShM Veterinarlyq baqylaý men qadaǵalaý territorialdyq inspektsiiasy qyzmetkerleri, qalalyq veterinarlyq qyzmet, qalalyq Kásipkerlik pen investitsiialar basqarmasy, Zoologiia jáne abattandyrý Institýty mamandarynan arnaiy komissiia qurdy», - dedi Sáken Dildahmet Facebook paraqshasynda.
Komissiianyń júrgizgen saraptamasyna kepterler ólgen jerde munyń aldynda aýmaǵy 100 sharshy metr muz aidyny bolǵan. Sol jerde barlyǵy 30 kepter ólgen.
«Qustar ýlanǵan bolýy múmkin. Komissiia músheleri kepterlerdiń denesin zerthanalyq zertteý júrgizý úshin aldy. Qustardyń ólimine ne yqpal etkeni zertteýlerden soń belgili bolady», - dedi S.Dildahmet.
