Almaty politsiiasy qala mektepterinde arnaiy mamandandyrylǵan kúzet qyzmetin engizýdi usyndy. Bul týraly politsiia departamentiniń qaladaǵy mektep direktorlarymen kezdesýinde aityldy, – dep habarlaidy «Ult aqparat».
Departament usynǵan derekterge sáikes, qaladaǵy 205 mekteptiń 16-synda ǵana arnaiy kúzet qurylymymen kelisimshart jasalǵan. Qalǵan mektepterde bul fýnktsiiany qaraýyl men vahterler atqarady. Kóbine egde jastaǵy kisiler túrli quqyqbuzýshylyqqa qarsylyq kórsetýge qaýqarsyz.
«Bilim mekemelerindegi oqýshylardyń qaýipsizdigi - búginde ózekti máselelerdiń biri. QR IIM biyl qańtarda orta bilim jáne mektepke deiingi bilim mekemelerindegi videobaqylaý júiesine arnaiy standarttar men talaptar shyǵarǵan bolatyn. Bul talaptar QR BǴM tarapynan da bekitildi. Videobaqylaý júiesi kabinetterdegi, mektepke jaqyn territoriiadaǵy ahýaldy tolyq baǵalaýǵa, adamdardyń sulbasy men bet-júzin ajyratýǵa múmkindik berýi tiis. Ókinishke qarai, barlyq mektepterdegi baqylaý júiesi talapqa sai kele bermeidi. Búginde Almatydaǵy 201 jalpy bilim beretin nysanda 2 858 kamera ornatylǵan. Ár mektepte orta eseppen 8 kamera ornatylǵan. Kóbine bul kameralar foiede tur. Syrttaǵy kameralar mektep mańynda ne bolyp jatqanyn tolyq kórsete almaidy» dedi jiynda Almaty qalalyq politsiia departamentiniń basshysy Serik Kúdebaev.
Aita ketý kerek, Almatyda bilim basqarmasy Tarazdaǵy oqýshyny zorlaý dereginen soń mektepterdegi ájethana máselesin qolǵa alǵan bolatyn. Basqarma basshysy Gúlnar Qojabergenova 1-1,5 jyl ishinde qaladaǵy 3 mekteptiń sanitarlyq toraby ishke engiziletinin aityp, ýáde berdi.
