Almatynyń politsiia departamenti keshe keshkisin qala ishindegi qoǵamdyq tártipti buzý faktilerine qatysty málimdeme taratty, dep habarlaidy "Ult aqparat".
«Keshe, 2019 jyldyń 10 maýsymynda shamamen 18-00-den basap 2019 jylǵy 11 maýsym saǵat 02-00-ge deiin Almaty qalasynda birneshe top tulǵa qoǵamdyq tártiptiń buzylýyna jol bermedi. Atalǵan quqyq buzýshylyqqa qatysqandardy politsiia ustady. Qazirgi ýaqytta atalǵan oqiǵalarǵa qatysty quqyq qorǵaý organdarynyń tarapynan tolyq quqyqtyq baǵa berilgen joq. Degenmen, politsiia qaýesetke jol bermeý jáne halyqqa senimdi aqparat jetkizý maqsatynda atalǵan derekterdi naqtylaityn birneshe faktini jariia etedi», - delingen taratylǵan aqparatta.
Vedomstvo málimetinshe, birinshiden, 10 maýsym kúni saǵat 18:00-de «Alǵabas» shaǵyn aýdanynda, «Alataý» teatrynyń aldyna R.Zaiytovtyń úndeýimen zańsyz sherý ótkizý úshin bir top adam jinalǵan. Olar politsiianyń «tarańdar» degen talaptaryn elemei, qarsylyq tanytqandary úshin ustaldy. Buǵan qosa olardyń keibiri «Almaty Arena» aýdanynda joldardy japqan.
«R.Zaiytovpen áńgimelesý júrgizilgennen keiin ol úiine jiberildi. Degenmen, R.Zaiytovpen áńgimelesý júrip jatqan kezde Almaty qalalyq politsiia departamentiniń aldyna ony qoldaǵan bir top adam jinaldy. R.Zaiytov úiinen kelip, olardan úilerine taraýdy, eshqandai zańsyz sharaǵa qatyspaýdy, arandatýshylyqqa ermeýdi ótindi. Jinalǵandar birneshe top bolyp, qala ishine tarap ketti. Biraq, olardyń biri jeke kóligimen Tóle bi men Abai kóshelerinde qozǵalysqa bóget jasady. 3-4 mashina qatarlasyp lek túzep, dybystyq dabyldaryn qosyp, tómen jyldamdyqpen qozǵaldy. Olar qalypty qozǵalysqa kedergi keltirdi. Dál osy ýaqytta atalǵan kóshede bir top adam jol ústimen júrip, qozǵalysqa bóget jasap, apattyq jaǵdai týyndatty. Sondai-aq qatty aiqailap, ysqyrdy, ózderin barynsha dóreki ustady», - dedi departamentten.
Taratylǵan aqparatqa qaraǵanda, quqyq buzýshylar qandai da bir talap qoimaǵan.
«Ekinshiden, zańsyz aktsiiaǵa qatysýshylar birneshe qylmystyq áreketter jasady. Máselen, túngi bir jarymda Tóle bi men Ótegen batyr qiylysynda, «Sairan» avtobeketine qarsy jolda zańsyz aktsiiaǵa qatysýshy kóligimen jol qozǵalysyn retteý qyzmetin atqaryp turǵan jol-patrýldik politsiia qyzmetkerin qaǵyp ketti. Dárigerler oǵan oń jaq tizesiniń jabyq synýy diagnozyn qoidy. Júrgizýshi qylmys ornynan boi tasalaǵanymen QR Qylmystyq kodeksiniń 345-babynda qarastyrylǵan belgiler boiynsha ustaldy», - dedi vedomstvodan.
Sonymen qatar Almaty qalasynyń Alataý aýdanynda keshki ýaqytta mas kúidegi bir top adam politsiianyń qyzmettik kóligin zaqymdaǵan. Olar kólikke tas laqtyryp terezesin syndyrǵan. Quqyq buzýshylar ustalǵan. Atalǵan fakti QR QK 293-baby boiynsha sotqa deiingi tergeýdiń biryńǵai tizilimine tirkelgen.
«Úshinshiden, keshki jáne túngi ýaqytta atalǵan quqyq buzýshylyqtarǵa qatysty politsiianyń koll-ortalyǵyna azamattardan 1 250 shaǵym túsken. Onyń 70 paiyzy túnde boldy. Halyq túngi ýaqyttaǵy shý men aiqaidan shoshynǵan. Júrgizýshiler jol júrisi erejesiniń óreskel buzylýyna narazylyq tanytqan. Politsiia organdary zańsyz áreketterdi tyiý boiynsha tiisti sharalardy qabyldady. Quqyq buzýshylar ustaldy. Qazirgi ýaqytta Almatydaǵy ahýal tolyqtai baqylaýda. Kólik pen barlyq qyzmetterdiń qalypty jumysy qamtamasyz etilgen. Kóshelerdegi qaýipsizdikti qamtamasyz etý boiynsha barlyq sharalar qabyldanǵan. Politsiia qoǵamdyq tártiptiń buzylýyna, kez kelgen quqyqqa qaishy áreketke jol bermeidi, azamattardyń ómiri men qaýipsizdigine tóngen qaterge zańǵa sáikes qatań tyiym salynatyndyǵyn málimdeidi. Qosymsha málimetter atqarapttar naqtylanýyna bailanysty BAQ-qa habarlanatyn bolady», - dep atap ótedi Almaty qalalyq politsiia departamentinen.
