Foto: Polisia.kz
Almaty politsiiasy kúsheitilgen jumys rejimine ótti, – dep habarlaidy Polisia.kz.
Qazaqstan Respýblikasynyń Táýelsizdik kúnin merekeleý kezinde qoǵamdyq tártipti qamtamasyz etý, qylmystardyń, sondai-aq basqa da zańsyz áreketterdiń der kezinde aldyn alý jáne jolyn kesý maqsatynda Almaty politsiiasy kúsheitilgen qyzmet túrine kóshirildi.
Osyǵan orai, Almaty qalalyq politsiia departamentiniń bastyǵy Arystanǵani Zapparov Almaty garnizonynyń biryńǵai saptúzeýin júrgizdi.
"Táýelsizdik kúni – orasan zor kúsh-jigerdiń arqasynda osy máńgilik qundylyqqa qol jetkizgen kóptegen urpaqtarǵa kórsetilgen qurmet. Bizdiń aldymyzda qoǵamdyq tártip pen azamattardyń qaýipsizdigin qamtamasyz etý mańyzdy mindeti tur. Bul – bizdiń konstitýtsiialyq jáne kásibi paryzymyz, al ony joǵary uiymdastyrýshylyqpen jáne sapaly deńgeide oryndaý – departament organdary men bólimsheleriniń barlyq qyzmetkerleriniń abyroily mindeti. Árbir politsiia qyzmetkeri qylmyspen jáne quqyq buzýshylyqpen kúres zańdylyqty qatań saqtaýǵa negizdelgenin este ustaýy kerek. Memlekettilik bizge bolashaqqa batyldyqpen qaraýǵa, bolashaǵymyzdy aiqyn kórýge múmkindik berdi", – dedi Arystanǵani Zapparov.
Sondai-aq qalalyq PD basshysy politsiia jumysynyń sapasyn arttyrýǵa kómektesetin Ishki ister ministrliginiń qyzmettiń servistik modeline kóshý jónindegi basym tujyrymdamalarynyń birin júzege asyrýǵa erekshe nazar aýdardy.
"Qaladaǵy tártip pen azamattardyń amandyǵy politsiianyń qalai jumys isteitinine bailanysty. Tártip saqshylarynyń qoǵammen tyǵyz bailanysta bolýy óte mańyzdy. Al materialdyq-tehnikalyq baza men memlekettik áleýmettik qoldaý olardyń oqiǵalardan qalyspai, qylmysqa qarsy turýyna múmkindik beredi. Mereke qarsańynda jeke quramǵa zor densaýlyq, baqyt, otbasylyq amandyq jáne zańdylyq pen quqyq tártibin qamtamasyz etý jáne qylmysqa qarsy kúreste sarqylmas kúsh-qýat tileimin", – dedi Arystanǵani Zapparov.
Saptyq tekserý barysynda aldyńǵy saptaǵy bólimshe qyzmetkerleriniń kiim-keshekteri, kólikterdiń jaǵdaiy, tehnikalyq jabdyqtary tekserildi. Sonymen qatar qaladaǵy qoǵamdyq tártipti qorǵaýdy kún saiyn qolǵa alatyn patrýldik politsiia Polkiniń, mamandandyrylǵan batalonnyń jasaqtary, ýchaskelik inspektorlar, JQAJ qyzmetkerleri, Ulttyq ulan sarbazdary komandirlerdiń baǵyt-baǵdary men nusqaýlaryn tyńdady.
Al, qyzmetinde joǵary kórsetkishterge qol jetkizgen, óz isiniń kásibi mamany dep tanylǵan politsiia qyzmetkerlerin Táýelsizdik kúni merekesine orai politsiia departamenti basshylyǵy marapattady.
