Almaty politsiiasy Jetisý oblysynyń turǵynynan qańtarda urlanǵan qarýdy tárkiledi, – dep habarlaidy Polisia.kz.
Qarý-jaraq dúkenine jasalǵan shabýylǵa qatysqan Jetisý oblysynyń 26 jastaǵy turǵyny ustaldy. Kúdiktini ustaý boiynsha arnaiy is-sharany Esirtki qylmysyna qarsy kúres basqarmasynyń qyzmetkerleri men politsiianyń arnaiy jasaǵy júrgizgen.
"L. esimdi azamatty jeke tintý barysynda qarý-jaraq dúkeninen qańtardaǵy tártipsizdik kezinde urlanǵan tapansha tárkilendi. Mamandandyrylǵan sot ruqsat bergen tintý barysynda kúdiktiniń úiinen tapanshanyń qaby tabyldy jáne tárkilendi. Sonymen qatar ustalǵan adamnyń Jetisý oblysy Qaratal aýdanyndaǵy ákesiniń úiine de tintý júrgizildi. Onda 12-kalibrli IJ-26 tegis uńǵyly myltyq qabymen, oǵan arnalǵan optika, pyshaq jáne tapansha túrindegi ottyq tárkilendi", – dedi Almaty qalasy PD Esirtki qylmysyna qarsy kúres basqarmasynyń bastyǵy Erlan Álmaǵambetov.
Atalǵan derek boiynsha sotqa deiingi tergeý bastaldy. Qylmystyq is QR QK-niń 291-baby 1-bóligi boiynsha tirkeldi.
