Almaty qalalyq PD bastyǵynyń orynbasary Rýstam Ábdirahmanov qańtar oqiǵasy kezinde qaza tapqan politseiler týraly aitty, - dep habarlaidy Tengrinews.kz tilshisi.
Buǵan deiin áleýmettik jelide Almaty politsiiasy bastyǵy orynbasarynan qaza bolǵandardyń arasynda basy kesilgen politseiler bar ma degen suraq qoiylǵan bolatyn. Rýstam Ábdirahmanov almatylyq politseiler arasynda ondai jaǵdai bolmady dep qysqasha jaýap berdi.
Keiinirek politsiia bastyǵynyń orynbasary jaǵdaiǵa jáne osy pikirden keiin týyndaǵan, quqyq qorǵaý organdary qyzmetkerleriniń basyn kesip alý jaǵdaiy múlde bolmaǵan degen pikirlerge qatysty jaýap berdi. Bul týraly BAQ-ta jariialanǵan bolatyn.
"Ulttyq ulanǵa, áskerlerge, Almaty oblysynyń Politsiia departamentine jáne basqa da oblystyq bólimshelerge eshqandai qatysym joq. Sondyqtan bárine qatysty pikir bildire almaimyn, keshe maǵan basy kesilgen almatylyq politseilerge qatysty suraq qoiyldy. Men Almaty qalalyq IID boiynsha qaza bolǵan politsiia qyzmetkerleri arasynda basy kesilgender joq dep jaýap berdim. Oq jaraqatynan qaza tapqan qyzmetkerler bar. Almaty Politsiia departamentiniń úsh qyzmetkeri qaza tapty. Sonymen qatar, qaýipsizdik kúshteriniń basqa da qaza tapqan qyzmetkerleri boldy, biraq mende olar týraly aqparat joq. Olarǵa qatysty tergeý amaldary júrgizilip jatyr", - dedi politsiia bastyǵynyń orynbasary.
