Almaty politsiiasy «Astex.kz» JShS men «ACD Technology» JShS-y qarjy piramidasynan zardap shekkenderdi izdep jatyr, dep habarlaidy "Ult aqparat".
2021 jyly 27 sáýirde bir top adam Almaty qalalyq politsiia departamentine qarjylyq piramida qurý jáne basqarý faktisi boiynsha «Astex.kz» jáne «ACD Technology» JShS basshylaryna qatysty ujymdyq ótinishpen júgindi (QR QK-niń 217 baby).
«Sotqa deiingi tergeý barysynda 2019 jyldyń aqpanynan bastap 2021 jyldyń qańtaryna deiingi aralyqta atalǵan JShS-nań laýazymdy tulǵalary jeke jáne zańdy tulǵalarmen memlekettik satyp alýǵa qatysý úshin qajet delingen qarajatty tartý boiynsha birlesken qyzmet týraly shart jasasqany anyqtaldy. Ekijaqty qujatqa sáikes, firmalar ai saiyn ár salymshyǵa aýdarylǵan somanyń 20% tóleýi kerek bolatyn. Sonymen qatar, «ASTEX.KZ» JShS-na 160 salymshynyń 1 mlrd teńgege jýyq qarajaty basqa kompaniiadan «MUDARABAN CAPITAL» JShS arqyly túskeni anyqtaldy. Sondai-aq, «ASTEX.KZ» JShS men «ACD technology» JShS-na basqa da kompaniialar arqyly salymshylardan aqsha aýdarylǵany belgili boldy», – dedi Almaty qalalyq politsiia departamenti bastyǵynyń orynbasary Rústem Ábdirahmanov.
Qarjy piramidasyn qurý jáne basqarýdy uiymdastyrǵan, buryn Qylmystyq kodekstiń 311-baby boiynsha sottalǵan, 39 jastaǵy K. jáne 47 jastaǵy M. kúdikti bolyp otyr. Olardy ustaýǵa qatysty jedel-tergeý is-sharalary júrgizilýde. Sot «ASTEX.KZ» JShS-men «ACD technology» JShS zańdy mekenjailarynda tintý júrgizý týraly qaýly shyǵardy.
«Joǵaryda atalǵan JShS basshylarynyń qylmystyq áreketterinen zardap shekken basqa tulǵalardy anyqtaý úshin azamattar protsesýaldyq turǵydan shaǵymdaný kerek. Osy maqsatta biz zardap shekkenderdiń kómek surap habarlasa alatyn telefondardy habarlaimyz: 8-778-375-16-00 jáne 8-775-594-42-00», – dedi Rústem Ábdrahmanov.
