Almaty qalalyq politsiia departamenti tanymal kásipkerdiń aryzy boiynsha Ǵabidolla Ábdirahymovqa qatysty qylmystyq is qozǵalǵanyn rastady, dep habarlaidy Sputnik Qazaqstan.
Kozachkov offside Telegram-arnasy Shymkent qalasynyń eks-ákimi Ǵabidolla Ábdirahymovqa qatysty qylmys is qozǵalǵanyn jazdy.
Jýrnalistiń sózine qaraǵanda, jaqynda bas prokýratýra reiderlik áreket boiynsha is qozǵalmaǵanyn málimdegen. Osylaisha, buǵan deiingi aqparatty joqqa shyǵarǵan. Ábdirahymovtyń ústinen reiderlik emes, alaiaqtyq boiynsha qylmystyq is qozǵalǵan.
"Sonymen, 19 mamyrda ishki ister organdaryna tanymal kásipker Saidolla Qojabaev aryzdandy. Ol Forbes jýrnalynyń baǵalaýy boiynsha tabysty 50 biznesmenniń tiziminde 49-shi orynda tur. Ol óz aryzynda bes adamnyń, sonyń ishinde Ábdirahymov pen Másimovtyń iri kólemde aqsha alǵanyn jazdy. 2-3 million dollar deidi. Negizi on million suraǵan", - dep jazdy Kozachkov.
Almaty qalalyq politsiia departamenti Qojabaevtyń aryzy boiynsha qylmystyq is qozǵalǵanyn rastady. Qazirgi kezde Qylmystyq kodekstiń 190-baby, 4-bóligi (Alaiaqtyq, asa iri mólsherde) aiasynda sotqa deiingi tergeý amaldary júrgizilip jatyr.
Aita keteri, bul qylmys úshin bes jyldan on jylǵa deiingi merzimge bas bostandyǵynan aiyrý jazasy qarastyrylǵan. Oǵan qosa, múlki tárkilenedi, belgili bir laýazymdardy atqarý nemese belgili bir qyzmetpen ainalysý quqyǵynan ómir boiyna aiyrýy múmkin.
Ǵabidolla Ábdirahymov 2008-2015 jyldary Premer-ministr keńsesi, Prezident ákimshiliginiń qurylymdarynda jumys istedi, básekelestikti qorǵaý jáne damytý agenttiginiń tóraǵasy boldy. Shymkent qalasyn eki ret basqardy.
2021 jyldyń qańtarynda mádeniet jáne sport vitse-ministri qyzmetine taǵaiyndaldy. Biraq toǵyz aidan keiin "basqa jumysqa aýysýyna bailanysty" bosatyldy.
