Foto: Kairat Konýspaev
Almatyda 2 myńnan astam qoǵamdyq tamaqtaný nysandary bar, onyń ishinde meiramhanalar, kafeler men ashanalar. Sońǵy jyldary tamaqtaný salasynda turaqty ósim baiqalyp, qoljetimdi ashanalar men shaǵyn dámhanalar kóbeidi. 2021 jyldyń birinshi jartyjyldyǵynda tamaq ónimderi men sýsyndar qyzmetterin kórsetýden túsken salyq túsimderi 1,8 mlrd teńgeni qurady. 2022 jyly olar eki esege jýyq – 3,4 milliard teńgege, al 2023 jyly odan da artyp, 7,1 milliard teńgege jetti. 2024 jyldyń birinshi jartyjyldyǵynda kirister 12,7 mlrd teńgeni qurady, bul turaqty oń dinamikanyń artqanyn baiqatady. Bul týraly Almatyda ótken «Almaty Ortalyq Aziianyń gastronomiialyq astanasy retinde: týrister úshin jańa kókjiekter» atty baspasóz konferentsisynda aityldy dep habarlaidy Ult.kz tilshisi.
Jiynda Almaty týrizm biýrosynyń PR-menedjeri Janar Nurlybek atqarylǵan jumystar, aldaǵy josparlar týraly aqparat berip, sonymen qatar týristerdiń pikiri men qyzyǵýshylyǵyn kórsetetin sandar men derekterdi bólisti.
«Almatynyń gastronomiialyq jáne bar sahnasynyń joǵary deńgeiiniń mańyzdy dáleli jergilikti sharap barlary men meiramhanalarynyń Star Wine List halyqaralyq gid - álemdegi eń jaqsy sharap mekemelerin kórsetetin bedeldi gidke qosylýy boldy. Gid kartada qazir Almatydaǵy segiz bar men meiramhana jáne Astanadaǵy bir mekeme bar, bul sharap mádenietin damytýda ońtústik astananyń kóshbasshylyǵyn atap kórsetedi.
Gid qala boiynsha gastro-týrlardyń daiyn stsenariilerin, sondai-aq taǵamdar men talǵamdardyń ártúrliligin kórsetetin mekemelerdiń tizimderin qamtidy. Sonymen qatar, Almatynyń bir bóligin úiińizge alyp ketýińiz úshin mindetti túrde tatyp kórýge turarlyq jergilikti taǵamdarǵa jáne gastrosývenirlerge erekshe nazar aýdarylady.
Biz Almatydaǵy gastronomiiany damytý maqsatynda arnaiy master-klass ótkizip áleýmettik jelide 628 150 kórermenniń nazaryn aýdardyq. Bul sharalar jergilikti turǵyndardyń da, álemniń túkpir-túkpirinen kelgen týristerdiń de qyzyǵýshylyǵyn arttyrdy»,- dedi Janar Nurlybek.
Al jiynda sóz alǵan ABR Bilim berý baǵdarlamalary bóliminiń basshysy Janna Bahmýtovanyń aitýynsha, elimizde etnomádeni ashanany damytý qolǵa alynyp jatyr. Spiker aldaǵy ýaqytta qazaq ashanasyn álemdik deńgeige jetkizý úshin jumystar jasalyp jatqanyn aitty.
«Týrister ulttyq jáne halyqaralyq taǵamdardyń keń tańdaýyn jasaǵysy keledi. Bizdiń «neo-kóshpeli taǵamdar» jáne dástúrli kóshpeli retseptter siiaqty trendter álemniń túkpir-túkpirinen kelgen taǵamdardy unatatyndar arasynda tanymal bolýda. Biz qazaq taǵamdaryn tereńirek zerttep, naqty retsebin alý úshin elimizdiń ár aimaǵynan derekter jinadyq. Etnograftar men tarihshylarmen kezdestik. Qazirgi tańda Almatyda «Aýyl», «Tór» , «Sandyq» syndy ulttyq baǵyttaǵy restorandar bar. Biz olardyń tanymaldyǵyn arttyrý baǵytynda jumys jasap jatyrmyz»,- dedi Janna Bahmýtova.
Almatynyń bar indýstriiasynyń ártúrliligi men joǵary deńgeiin kórsetý maqsatynda Almaty týrizm biýrosy seriktestermen birlesip, 2GIS platformasynda jariialanǵan arnaiy irikteý daiyndady. Bul tanymdyq karta qonaqtar men qala turǵyndaryn Almatynyń eń jaqsy barlary men meiramhanalarymen tanystyrady.
