Almaty oblysynyń turǵyny Kenjebek Alpysbaev «Nur Otan» praimerizine qatysýǵa ótinish berý barysynda qyzyq jaǵdaiǵa tap boldy. Partiiaishilik irikteýge qatysýǵa niet tanytqan azamat partiianyń Alakól aýdandyq filialyna barǵanda, qaǵaz júzinde óziniń «o dúnielik» bolyp ketkenin estip tań qalǵan, dep habarlaidy "Ult aqparat".
«Men osy kezge deiin esh alańsyz ómir súrip, jumysymdy istep jattym. «Nur Otan»-nyń praimeriz jariialaǵanyn estip, aýyldastarymnyń máselelerin sheshýge yqpal etý úshin aýdandyq máslihatqa úmitker depýtat retinde praimerizge ótinish berýdi uiǵardym. Partiianyń arqasynda AHAJ-dyń osydan 9 jyl buryn meni ólgenderdiń sanatyna qosyp jibergenin bildim», - dep ashýlandy Kenjebek Alpysbaev.
Óz kezeginde Almaty oblystyq Partiialyq baqylaý komissiiasy bul keleńsizdikti joiyp, Kenjebek Alpysbaevty praimerizge qatysýǵa niet bildirgen úmitker retinde tirkedi. Sonymen birge «Nur Otan» óz isine nemquraily qaraǵandardy jaýapqa tartyp, tiisti shara qoldanýdy talap etti.
«Ashyǵyn aitsam, mundai jaýapsyzdyqqa ne derimdi bilmei otyrmyn. Esh negizsiz adamdy óldi dep qalai jaza salýǵa bolady?», - dep málimdedi oblystyń partiialyq baqylaý komissiiasynyń tóraǵasy Ermek Kelimseiit Alakól aýdandyq ákimi apparatynyń jetekshisi Damir Satybaldievqa partiialyq sógis berýdi usynyp.
Sondai-aq partiialyq baqylaý komissiiasy azamattardyń hal aktilerin tirkeý bóliminiń basshysy Dinara Muhamedjanovaǵa bailanysty tártiptik jaýapkershilik sharasyn qoldanýdy talap etti.
Bir apta buryn elimizde «Nur Otan»-nyń partiiaishilik irikteýi - praimerizge qatysý úshin ótinishter qabyldaý bastalǵanyn esterińizge sala ketkimiz keledi. Partiia Lideri Nursultan Nazarbaevtyń tapsyrmasymen «Nur Otan» praimerizi elimizdiń partiialyq-saiasi damý tarihynda tuńǵysh ret respýblikalyq partiiaishilik sailaý aýqymynda ótedi.
Budan buryn partiia tóraǵasynyń birinshi orynbasary Baýyrjan Baibektiń atap ótkenindei, bul – Elbasynyń bastamasymen qolǵa alynǵan «Senim. Dialog. Bolashaqqa nyq qadam» partiia jumysyn «qaita jandandyrý» baǵdarlamasynyń qorytyndy kezeńderiniń biri. Praimerizdiń negizgi maqsaty – aldaǵy Májilis pen barlyq deńgeidegi máslihat sailaýlaryna partiialyq tizimderdi qalyptastyrý úshin básekeles kúres negizinde jańa kóshbasshylardy aiqyndaý.
Partiia baspasóz qyzmetiniń habarlaýynsha, bir apta ishinde praimerizge qatysýǵa 7000-ǵa jýyq adam ótinish bergen. Olardyń 2398-i áiel, onyń ishinde 100-i – kópbalaly ana, 1706-sy – 35 jasqa deiingi jas. Bastaýysh partiia uiymdary arqyly 2444 adam usynylsa, 4589 kandidat – ózin-ózi usynǵandar.
Bileýshi partiianyń baspasóz qyzmeti taratqan aqparatqa sáikes, praimerizge qatysý úshin ótinishti primaries.kz saitynda «Praimeriz» aqparattyq júiesi arqyly onlain joldaýǵa nemese aýmaqtyq uiymdastyrý komitetterine jeke ótinish berýge bolady. Kandidattardy usyný jáne tirkeý 28 tamyzǵa deiin jalǵasady.
Partiia qundylyqtaryn ustanatyn jáne sailaý quqyǵy bar kez kelgen azamat úmitker bola alady. Ol úshin praimerizge qatysýshylardy tirkeý merzimi aiaqtalǵanǵa deiin «Nur Otan» músheligine ótý kerek.
Praimeriz ótkizý, sondai-aq kandidattarǵa uiymdastyrýshylyq jáne quqyqtyq qoldaý máseleleri boiynsha «Nur Otan» partiiasy 8 (800) 080 4441 arnaiy jedel jelini iske qosty.
