Almaty qalasyndaǵy epidahýal Almaty oblysyndaǵy irgeles aýdandarǵa qatty áser etip otyr. Oblys ákiminiń orynbasary Batyrjan Baijumanov ortalyq kommýnikatsiialar qyzmetinde ótken brifingide osyndai málimet aitty, dep habarlaidy QazAqparat.
«Birinshe kezekte virýspen kúrestiń algoritmin Almaty qalasymen birlesip jasaǵan bolatynbyz. Pandemiianyń birinshi tolqynynda blok beketter qoiylǵanyn bilesizder. Qazir ondai problema joq. Qazir vaktsinatsiia boiynsha birlesken jumys júrip jatyr. Iaǵni, bizdiń oblystyń turǵyndary Almaty qalasynda eshbir kedergisiz ekpe saldyra alady», - dedi ákimdik ókili.
Ákimniń orynbasary oblystaǵy epidahýaldy Almaty qalasyna baryp jumys isteitinder ýshyqtyryp turǵanyn moiyndady.
«Shekteý sharalary respýblikanyń bas sanitar dárigeriniń qaýlysymen bekitilgen. Sondyqtan shekteý bárinde birdei. Almaty qalasyna irgeles 5 aýdan bar. Olardyń tirshiligi qalamen tyǵyz bailanysty. Osy irgeles aýdandardaǵyy aýrýshańdyq kórsetkishi Almatydaǵy siiaqty joǵary. Óitkeni turǵyndarynyń kóbi Almaty qalasynda jumys isteidi. Osylaisha, jumysta aýrý juqtyryp, ony úiine ákeledi. Sondyqtan irgeles aýdandarda aýrýshańdyq kórsetkishi joǵary bolyp tur. Búginde Almaty qalasynda aýrýshaqtyń túsip edi, Almaty oblysynda da túse bastady», - dedi Batyrjan Baijumanov.
Al oblystyń bas sanitar dárigeri Erǵali Sydymanov oqý jyly bastalar tusta APORT MALL saýda ortalyǵynyń ashyq bolýy epidahýaldy ýshyqtyrǵanyn moiyndady.
«Shynymen de sabaq bastalar kezde Almaty qalasyndaǵy saýda nysandary jabyq bolǵandyqtan, bizdegi APORT MALL saýda ortalyǵyna aǵyldy. Sonyń saldarynan epidahýal nasharlady. Biraq bul bir kún ǵana boldy. Biz jedel sheshim qabyldap, erteńinde-aq, saýda nysanyndaǵy sanitarlyq-epidemiologiialyq saqtyq sharalary qatań baqylaýǵa alynǵan bolatyn», - dedi Erǵali Sydymanov.
