Almaty oblysy politsiia departamentiniń tártip saqshylary ákimshilik quqyq buzýshylyq aiyppuldaryn tóleý tártibin túsindirdi, dep habarlaidy «Ult aqparat» Almaty oblysy politsiia departamentiniń baspasóz qyzmetine silteme jasap.
«Ákimshilik jaza aiyppul túrinde qoldanylǵan jaǵdaida, siz jeti táýlik ishinde aiyppul somasynyń 50% ǵana tóleýge quqyǵyńyz bar. Jeti táýlik ótkennen keiin aiyppul jaza qoldanylǵan kúnnen bastap kúntizbelik otyz kúnnen keshiktirilmei erikti túrde tolyq mólsherde tólenýge jatady. Aiyppul ekinshi deńgeili bankterdiń kassalarynda, sondai-aq elektrondy tólem terminaldary arqyly, smartfonǵa bekitilgen túrli qosymshalar arqyly tólenedi», – deidi Almaty oblysy politsiia departamentiniń ákimshilik praktika bólimi basshysy, politsiia maiory Saiat Ibraimov.
Eger aiyppul tólengennen keiin avtomatty túrde smartfonnan joiylmasa, onda tólem týraly túbirtek hattama jasalǵan jerdegi nemese turǵylyqty jerińizdegi ákimshilik tájiribe bólimine usynylýy kerek.
«Aiyppuldy elektrondyq tólem terminaldary arqyly tólegen jaǵdaida siz hattama nómirin kórsetesiz, tólem belgisi Respýblikalyq derekter bazasynda avtomatty túrde qoiylady. Sondai-aq aiyppul tóleý týraly Ákimshilik praktika bólimderine habarlaý mindetinen bosatylasyz, tólemdi tekserý úshin túbirtekti ákimshilik praktika bólimine usyna alasyz. Foto-beine tirkeý júielerimen anyqtalǵan buzýshylyqtar boiynsha aiyppuldyń bolýy týraly aqparatty Egov.kz elektrondyq úkimet portaly arqyly ala alasyz», – dep tolyqtyrdy Saiat Ibraimov.
Aiyppul erikti túrde tólenbegen jaǵdaida, material qyryq táýlik ótkennen keiin oryndaýǵa bailanysty shyǵyndar úshin aiyppul somasynyń 20%-yna qosymsha aqy tólei otyryp, májbúrlep oryndatý úshin sot oryndaýshylaryna elektrondyq formatta avtomatty túrde jiberiledi.
Aiyppuldy ýaqtyly tólemegen adam jazany oryndaýdan jaltarǵan bolyp esepteledi.
