Almaty oblysynyń Kóksý aýdanynda jerasty sýlary kóterilip jatyr. Bul týraly óńir basshysy Amandyq Batalovtyń esepti kezdesýinde aýdan sharýalary jetkizdi, dep habarlaidy "Ult aqparat".
Kóksý aýdanynda jerasty sýlary kóterilip, egis alqaptaryn jii basyp qalýda.
«Kóksý aýdany boiynsha 196 shaqyrymdy quraityn 34 drenaj kanaly bar. Osy kanaldyń jaǵdaiy óte nashar. 30 jyldan astam ýaqyt tazalanbaǵan. Saldarynan egistik jerlerde jerasty sýlary kóterilip, tuzdanyp, qamys basyp jatyr», - dedi eseptik kezdesýde sharýa qojalyǵynyń jetekshisi Sekenbai Sheńgelbaev.
Sharýa drenajdy qazý jumystarynyń jobalyq-smetalyq qujattarynyń daiyn ekenin jetkizip, Amandyq Batalovtan qarjy bólýge yqpal etýdi surady. Oblys ákimi bul másele nazarda ekenin aityp, biylǵy jyldyń biýdjetin naqtylaý barysynda drenajdy aryqtar qazýǵa qarjy qarastyrylatynyn atap ótti.
«Sýarmaly jerlerdiń bárin qalpyna keltirýge 200 mln teńge bólip beremiz. Bul máseleni jaqsy bilemiz. Jumys jasap jatyrmyz», - dedi Amandyq Batalov.
