Jetisýlyqtar qýańshylyqtan zardap shegip otyrǵan Mańǵystaý óńirine mal azyǵyn jóneltti, dep habarlaidy "Ult aqparat".
Eskeldi aýdanyna qarasty birneshe eldi meken turǵyndary birigip, biyl shabylǵan kópjyldyq shóptiń bes vagonyn lyq toltyryp jiberdi. Bul shamamen 70 tonna azyq. Birligi jarasqan aýyl halqy aldaǵy ýaqytta taǵy da shóp jinap jóneltýge daiyn. Biyl aýdan sharýalary 5400 gektarǵa jońyshqa seýip, shóp orý naýqanyn oidaǵydai ótkizip keledi.
«Aýyldaǵy halyqta maldan basqa ne bar? Malynan aiyryldy degen sóz, janynan aiyryldy degenmen birdei. Soǵan elim dep, osyndai azamattar bir jaǵadan bas, bir jeńnen qol shyǵaryp, atalarymyz, inilerimiz osylai birigip jatyrmyz», - dedi Eskeldi aýdanyna qarasty Qainarly aýylynyń turǵyny Shalqar Beken.
