Almaty oblysy boiynsha qylmystyq-atqarý júiesi departamentiniń LA-155/8 mekemesinde (joǵarǵy qaýipsizdik) tintý jumystary júrgizildi, - dep habarlaidy "Ult aqparat".
Shara barysynda 31 birlik uialy telefon (qarapaiym-16, smartfondar -15), 10 zariadtaǵyshtar quraldar, 6 sim-karta, 3 dana qulaqqap, 3 dana MP3 oinatqysh, 2 oiyn karta, 30 metr elektr sym jáne 17 dana qoldan jasalǵan tesýge jáne kesýge arnalǵan quraldar (pyshaq, qairaýysh jáne t.b.) taýyp, tyiym salynǵan zattar tárkilendi.
«Qyzmetkerler tyiym salǵan zattardy sottalýshylarǵa olardyń týǵan-týystary men tanystary jetkizedi, keibiri tyiym salynǵan zattardy mekemeniń syrtqy qorshaýynan laqtyrady. Bul baǵytta aldyn alý jumystary júrgizilip turatyndyǵyna qaramastan zańsyz áreketter bolyp turady. Osyǵan bailanysty mekeme ákimshiligimen únemi tintý jumystary júrgiziledi. Týystaryn zańbuzýshylyqqa itermelegen sottalǵandar mindetti túrde tártiptik jazaǵa tartylatynyń, al tyiym salynǵan zattardy mekemege ótkizýshiler jazasyz qalmaitynyń eskertemiz», - dedi óńirlik Qylmystyq atqarý júiesi Departamenti bastyǵynyń orynbasary Qanat Ashov.
Vedomstvo ókilderi tintý jumystary videoǵa túsirilgenin jetkizdi.
«Mekeme ákimshiligi men QAJ qyzmetkerleri tarapynan zań buzýshylyqtarǵa jol berilmegen. Sottalǵandar arasynan tintý jumystaryna bailanysty aryz-shaǵymdar túsken joq. Osy is-sharanyń zańdylyǵyn jáne sottalǵandardyń quqyqtarynyń saqtalýyn qamtamasyz etý úshin barlyq áreketter videoǵa túsirildi»- dedi Almaty oblysy boiynsha mekemelerde kylmystyq jazalardyń oryndalý zańdylyǵyn kadaǵalaý jónindegi mamandandyrylǵan prokýror Azamat Abdýldaev.
Tekserý sharasy qadaǵalaý jónindegi mamandandyrylǵan prokýratýra ókilderiniń, № 3660 áskeri bóliminiń jeke quramynyń, mekeme qyzmetkerleriniń jáne QAJ Departamentine baǵynysty mekemelerdiń qyzmetkerleriniń qatysýymen júrgizildi.
«Atalǵan is-shara sanitarlyq-epidemiologiialyq normalarǵa sáikes ótkizildi»,- delingen vedomstvonyń habarlamasynda.
