Jyl sońyna deiin Almaty oblysynda 35 mektep, al onyń 24-i Bilim kúni paidalanýǵa beriledi. Bul týraly búgin oblys ákimi Amandyq Batalov Taldyqorǵanda ótken ustazdardyń tamyz konferentsiiasynda habarlady, - dep Almaty oblysy ákiminiń baspasóz qyzmeti aqparat taratýda.
Qalyptasqan úrdiske sai jańa oqý jyly qarsańynda ótkizilgen keńes jumysyna oblys ákimi Amandyq Batalov, Qazaqstan Respýblikasynyń Bilim jáne ǵylym ministrliginiń Ǵylym komitetiniń tóraǵasy Erkin Sadyqov jáne oblystyń barlyq aýdan-qalasynan bilim berý salasynyń qyzmetkerleri qatysty.
Oblys ákiminiń orynbasary Jaqsylyq Omar konferentsiiany resmi túrde ashyp, júrgizip otyrdy.
Negizgi baiandamany oqyǵan Almaty oblystyq bilim basqarmasynyń basshysy Lázzat Bazarqulova, konferentsiiaǵa qatysýshylarǵa ótken oqý jylynyń, UBT-nyń qorytyndysyn baiandap, jańa oqý jylynda júkteletin negizgi máselelerge toqtaldy.
Bilim basqarmasy basshysynyń sózine súiener bolsaq, jańa oqý jylyna qoiylar talaptardyń negizgisi - bilim deńgeiin kóterý, pedagogikalyq ujymnyń arasyndaǵy tártip pen uiymshyldyqty arttyrý, árbir ustaz ben mektep ákimshiliginiń jumys nátijeliligine qoiylar talapty kúsheitý bolyp tabylady. Baiandamada Memleket basshysy men QR Bilim jáne ǵylym ministrliginiń jańadan engizgen talaptaryn ustazdar qaýymynyń buljytpai oryndaýy qajettigi jaiynda aityldy. Atap aitqanda, úsh tuǵyrly til saiasaty, «Rýhani jańǵyrý» baǵdarlamasyn júzege asyrý, pedagogtardyń biliktiligin arttyrý jáne ózge de mańyzdy tapsyrmalar júkteldi.
Ótken jyldyń jetistikterine toqtalǵan oblystyń bas ustazy problemalyq máselelerge de kóńil aýdardy. Olardyń ishinde UBT-nyń nátijesikóńil kónshitpedi. L. Bazarqulova osy iske jaýapty tulǵalarǵa, sonyń ishinde oblystyq bilim basqarmasyna da kemshilikterdi aldaǵy oqý jylynda qaitalamaýdyń qam-qareketin oilastyrýǵa búginnen bastap kirisýdi talap etti.
Konferenetsiia barysynda sóz sóilegen Qazaqstan Respýblikasynyń Bilim jáne ǵylym ministrliginiń Ǵylym komitetiniń tóraǵasy Erkin Sadyqov, bilim men ǵylymdy damytýdyń jańa memlekettik baǵdarlamasy men bilimdi damytýdyń jańartylǵan mazmuny týraly tolyqtai túsindirip berdi.
Jaryssózge qatysqan ustazdar kún tártibinde búgingi kúnniń ózekti máselelerine toqtaldy. Olardyń ishinde pedagogtardyń básekege qabilettiligi, jańasha bilim berý mazmuny, patriottyq tárbie, dýaldy oqytý, tehnikalyq jáne kásibi bilim berýde eńbek naryǵynyń suranysyna sai keletin bilikti kadrlar daiyndaý máseleleri aityldy.
Pedagogtardyń tamyz konferentsiiasyn óńir basshysy Amandyq Batalov qorytyndylady.
Ustazdar qaýymyn jańa oqý jylynyń bastalýymen quttyqtap, jumystaryna tabys tilei kele, jańa oqý jylyna qoiylǵan tapsyrmalardyń basym baǵyttaryn aiqyndap ótti.
- Qurmetti jiynǵa qatysýshylar, qurmetti ustazdar! Keler oqý jylynda pedagogtarymyzǵa úlken mindetter artylady. Elbasynyń «Bolashaqqa baǵdar: rýhani jańǵyrý» atty baǵdarlamalyq maqalasynda usynǵan qoǵamdyq sanany jańǵyrtý josparyn iske asyrý boiynsha óskeleń urpaqpen túsindirme jumystaryn birlesip júrgizýimiz qajet.
Memleket basshysy Nursultan Ábishuly Nazarbaevtyń qoldaýynyń arqasynda bilim berýdiń qazaqstandyq úlgisi damýdyń jańa satysyna kóterilýde, belsendi túrde zamanaýi infraqurylym qalyptasýda. Sol sebepti, kúsh-jigerimizdi bir arnaǵa buryp, barlyq baǵyttar boiynsha birlese jumys jasaýmyz qajet. Bizdiń maqsatymyz ortaq, ol elimizdiń óskeleń urpaǵyna sapaly bilim berý, ult jandy, elimizdiń maqtan tutar azamattaryn tárbielep shyǵý, - dedi A. Batalov.
Óz sózin jalǵasytar kele óńir basshysy bilim salasynyń aqsap turǵan kún tártibindegi máselelerine erekshe kóńil bólý qajettigin eskertti. Solardyń ishinde UBT-nyń nátijesi, balalardy qosymsha bilimmen qamtýdyń az úlesi, mektep direktorlarynyń atymen bailanysty oryn alǵan keleńsiz oqiǵalar, kadrlardy jumysqa qabyldaý kezindegi óz isine jaýapsyzdyq máseleleri bar. Sondai-aq oblys ákimi tárbieleý isiniń bosańsyp ketýiniń saldarynan ýaqytynan erte júkti bolý, jasóspirimder arasyndaǵy qylmystyń artý derekteriniń kóbeiip bara jatqandyǵyna da nazar aýdardy.
Osy atalǵan máselelerge bailanysty Amandyq Batalov aýdan-qala ákimderine, oblystyq bilim basqarmasynyń basshysyna jumystaryn qaita qarap, aitylǵan árbir baǵyt boiynsha tiisti shara qoldanýdy júktedi. Sonymen qatar oblys ákimi aýdan-qala ákimderine fizika pániniń muǵalimderin oqýshylarymen birge «Astana EKSPO-2017» halyqaralyq mamandandyrylǵan kórmesine baryp qaitýyn, olardy jatyn orynmen jáne tamaqtanýyn qamtamasyz etýdi tapsyrdy.
Óńir basshysy úsh tilde oqytýdy jetildirý, «Rýhani jańǵyrý» baǵdarlamasyn júzege asyrý, mektepke deiingi, tehnikalyq jáne kásiptik bilim berý máselesimen qatar ata-ana qamqorlyǵynsyz qalǵan balalardy baspanamen qamtý máselesi erekshe baqylaýda turǵandyǵyn eskertti.
Osydan keiin óziniń kásibi sheberligin shyńdaýǵa úlken kóńil bólip, ustazdyq etýdiń jańa ádisterin turaqty engizip júrgen birneshe ustazdardyń esimin atap, ótken jyldyń qorytyndysy boiynsha úzdik dep tanylǵan ustazdardy marpattaý rásimin ótkizdi. Olardyń ishinde «Qazaqstan Respýblikasynyń bilim berý isiniń qurmetti qyzmetkeri» jáne «Y.Altynsarin» atyndaǵy tósbelgilermen marapattalǵandary da boldy. Sondai-aq ustazdarǵa oblys ákiminiń Qurmet gramotalary men Alǵys hattary berildi.
Esterińizge salar bolsaq, I.Jansúgirov atyndaǵy Mádeniet saraiynyń foiesinde oblystyń bilim berý mekemeleriniń atqaryp jatqan jumystarynyń basym baǵyttaryn kórsetetin kórme uiymdastyryldy.
Aǵymdaǵy jyly Almaty oblysynyń bilim berý salasynyń biýdjeti 153,7 mlrd. teńgeni qurady. Onyń ishinde bilim berý nysandarynyń qurylysyna 27 mlrd. teńgeden astam qarajat qarastyrylǵan. Óńirde 48 bilim berý nysanynyń qurylysy men qalpyna keltirý jumystary júrgizilýde. Jyl sońyna deiin 44 mekteptiń 35-i paidalanýǵa beriledi. Bilim kúninde 24 jańa mektep óziniń alǵashqy oqýshylaryna esigin ashpaq. Osy mektepterdiń 23-i úsh aýysymda oqytý máselesin sheshetin bolady. Al 2018 jyly taǵy 10 mektep salý arqyly úsh aýysymda oqytý máselesi tolyqtai sheshilmek. Sonymen qatar, biylǵy jyly 24 mektepte kúrdeli jóndeý jumystary júrgizilgendigin atap ótken jón.
