Foto: videodan skrinshot
Almaty oblysynda mektep oqýshylaryna qatysty álimjettik jasalǵan video áleýmettik jelilerde tarady, dep habarlaidy Ult.kz.
Oqiǵa Ile aýdanyna qarasty Qaraoi aýylynda bolǵan. Beinejazbada birneshe oqýshy qatar tizilip turǵany jáne olardyń bireýinen soqqy kórip jatqany anyq baiqalady.
Almaty oblysy Politsiia departamentiniń málimetinshe, áleýmettik jelilerdi baqylaý barysynda kámeletke tolmaǵandar arasynda oryn alǵan zańsyz áreketterdi kórsetetin video anyqtalǵan.
"Oqiǵa 2024 jyly qyrkúiekte Ile aýdany Qaraoi aýylynda bolǵany belgili boldy. Bul derek boiynsha politsiiaǵa azamattardan aryz-shaǵym túsken joq. Qazir kámeletke tolmaǵan balaǵa dene jaraqatyn keltirý deregi boiynsha is tirkelip, sotaldy tergeý júrgizilip jatyr. Balalardy tárbieleý jónindegi mindetterin tiisinshe oryndamaǵany úshin quqyqbuzýshy jasóspirimniń jáne oqiǵany beinetaspaǵa túsirgen mektep oqýshysynyń zańdy ókilderi ákimshilik jaýapkershilikke tartyldy", - dedi politsiia.
Sonymen qatar, jasóspirimder profilaktikalyq esepke qoiylǵany belgili boldy.
"Kámeletke tolmaǵandar isteri jónindegi komissiiaǵa qosymsha yqpal etý sharalaryn qabyldaý týraly usynys engizildi. Kámeletke tolmaǵandar arasyndaǵy mundai zorlyq-zombylyq áreketteri qoǵamdyq tártip pen zańdylyq qaǵidalaryn óreskel buzý sanalady. Osy tárizdes quqyqbuzýshylyqtarǵa qatysy bar barlyq tulǵa zań aiasynda qatań jaýapkershilikke tartylady", - dep eskertti PD ókilderi.
