Ile aýdanynyń Boraldai aýylynda jaiaý júrginshini qaǵyp, qashyp ketken júrgizýshini politsiia bir jarym táýlik ishinde taýyp, ustady. Júrginshi jedel járdem kelgenshe sol jerde kóz jumǵan, dep habarlaidy "Ult aqparat".
Almaty oblystyq Politsiia departamenti baspasóz qyzmetiniń málimetinshe, Ile aýdanynda Politsiia basqarmasynyń kezekshi bólimine túnde saǵat 00:30-de Boraldai aýylynan habarlama túsedi. Kóliktiń jaiaý júrginshini qaǵyp ketkeni jáne onyń jedel járdem jetkenge deiin sol jerde qaitys bolǵany habarlanǵan. Marqumnyń 52 jastaǵy jergilikti turǵyn ekeni anyqtaldy. Belgisiz avtokólik oqiǵa orynan qashyp ketken, al jol apatyn eshkim kórmegen bolyp shyqty.
«Oqiǵa ornyn muqiiat qaraý barysynda tártip saqshylary kóliktiń aldyńǵy shamynyń synyǵy men boiaýdyń belgilerin tapqan. Sol bólshekterdiń arqasynda jol apatyn jasaǵan kóliktiń túr-túsin anyqtaýǵa múmkin týdy. Ol jasyl tústi «Toyota Rav 4» kóligi bolyp shyqty. Jedel izdestirý jumysy uiymdastyryldy. Bir jarym táýlik ishinde kólik apatyna qatysy bar avtokólike tabylyp, 35 jastaǵy Almaty qalasynyń turǵyny ustaldy. Kólik arnaiy turaqqa qoiyldy», - dedi Almaty oblysy PD Jergilikti politsiia basqarmasy izdeý tobynyń aǵa inspektory Erlan Káribaev.
