2030 jylǵa deiin Almaty oblysynda jańartylǵan energiia kózderiniń 76 nysanyn iske asyrý josparlanǵan. Bul týraly atalǵan óńir ákimi Amandyq Batalov málim etti, dep habarlaidy QazAqparat.
«Almaty oblysynyń aýmaǵynda Qazaqstannyń sý energiia resýrstary qorynyń 65 paiyzy shoǵyrlanǵan. Sol siiaqty Jońǵar qaqpasy men Shelek dálizi jel elektr stansalarynyń áleýetti qurylysynyń biregei alańdary bolyp otyr. Bul osy salany belsendi investitsiialaý úshin qolaily jaǵdai týǵyzyp otyr. Máselen, búgingi tańda oblysta jalpy belgilengen qýaty 332,4 MVt bolatyn jańartylǵan energiia kózderiniń 32 nysany jumys isteidi, olarǵa 50,1 mlrd teńge investitsiia tartylǵan», - dedi óńir ákimi Úkimet otyrysynda.
Onyń aitýynsha, sońǵy 5 jylda óńirde jiyntyq qýaty 250,4 MVt bolatyn 18 nysan paidalanýǵa berildi.
«2020 jyly jalpy belgilengen qýaty 62,9 MVt bolatyn 4 joba iske asyrylyp, 14,4 mlrd teńge investitsiia salynyp, 30 jumys orny ashyldy. Al biyl jalpy qýaty 154,6 MVt, quny 84 mlrd teńge bolatyn, 63 jumys orny qurylatyn 7 jobany júzege asyramyz dep josparlap otyrmyz. Al jalpy 2030 jylǵa deiin oblysta 76 nysandy iske asyrý josparlanǵan», - dedi A.Batalov.
Oblys ákiminiń sózine qaraǵanda, QR Energetika ministrligimen jáne «KEGOK» AQ-men kelisilip, oblystaǵy jeti aýdanda kerneýi 110-220 kV 1,3 myń shaqyrym áýe jelilerin elektrmen jabdyqtaý shemalaryn damytýdy kózdeitin «Almaty oblysynyń ońtústik-shyǵys aýmaǵyn elektrmen jabdyqtaý» jobasynyń TEN-i ázirlendi.
