Jańa oqý jyly qarsańynda aýdan ortalyǵynda 1200 oryndy jańa mektep paidalanýǵa berildi. Elbasynyń «Nurly jol» baǵdarlamasy aiasynda iske qosylǵan bilim shańyraǵynyń ashylý saltanatyna oblys ákimi Amandyq BATALOV qatysyp, turǵyndar qýanyshyna ortaqtasty.
Óńir basshysy Amandyq Ǵabbasuly ustazdar men oqýshylardy jáne ata-analardy jańa mekteptiń ashylýymen quttyqtady. Halyqtyń paidalanýyna berilip otyrǵan bul igilik Elbasy saiasatynyń arqasynda júzege asyrylǵanyn jetkizdi. «Osy jyly oblysta 49 myń bala birinshi synypqa barady. Óńirimizde 35 mektep salynyp jatyr. Sonyń 27-sin jańa oqý jylynda, qalǵanyn jyl aiaǵyna deiin ashatyn bolamyz. Jańa oqý jylyn jańa ǵimaratta bastaǵaly otyrǵan sizder qandai baqyttysyzdar. Osyndai jaǵdai jasalýyna jaýap retinde jaqsy oqyńdar. Uzynaǵash aýylyndaǵy orta mektep sizderdiń bilimdi azamat bolyp qalyptasýlaryńa jol ashsyn. Ustazdar men ata-analaryńdy únemi úzdik baǵamen qýantyp júrińizder», – dedi oblys ákimi.
Ata-analar atynan ardager ustaz Altynjan Núsipálieva Elbasynyń saliqaly saiasatyn júzege asyryp otyrǵan oblys basshysyna, aýdan atqaminerlerine alǵys aitty. Ásem ǵimarat turǵyzyp, halyqtyń igiligine usynǵan qurylystyń bas merdigeri «Rigolit» jaýapkershiligi shekteýli seriktestiginiń direktory Seidýla Sarsekov mektep direktory Serik Tilepbergenovke nysannyń simvolikalyq kiltin tapsyrdy. Aýdannyń aitysker jas aqyny Aitýǵan Jetebaev dombyramen arnaý aitty. Aýdandyq máslihat depýtaty, aýdandyq kásipodaq uiymynyń tóraǵasy Áskerbek Abaev kópshilikke bata berdi. «Jas ulan» oqýshylar úiiniń jas bishileri bi bilep, birinshi synyp tabaldyryǵyn attaǵaly otyrǵan bir top búldirshin ortaǵa shyǵyp, óleń oqydy.
Oblys ákimi Amandyq Batalov, máslihat depýtaty Áskerbek Abaev jáne ardager-ustaz, ata-ana Altynjan Núsipálieva lenta qiiý rásimin oryndap, ájeler shashý shashty. Oblys basshysy bastaǵan qurmetti qonaqtar mektep ishimen tanysty. Zamanaýi úlgide boi kótergen bilim ordasyna 1 mlrd. 924 million teńge jumsalypty. 15 myń sharshy metr ǵimarattyń ishi qajetti qural-jabdyqtarmen jaraqtalǵan. Eki sportzal bar, onyń biri 168 sharshy metrlik gimnastika zaly, ekinshisi 648 sharshy metr voleibol, basketbolǵa arnalǵan. Tiisti pán kabinetteri, kitaphana, sheberhana bar. Mektep aýlasynyń jalpy jer kólemi 4 gektar quraidy.
Aýdan ortalyǵynyń shetinde keiingi jyldary jańa turǵyn úiler oramynyń paida bolýymen birge áleýmettik nysandarǵa degen qajettilik te týyndaǵan bolatyn. Ony sheshýdiń joldary birtindep júzege asyrylyp keledi. Sonyń biri osy bilim uiasynyń qoldanysqa berilýi. Jalpy biyl aýdan boiynsha bes mektep ǵimaraty boi kóterdi.
Serik SATYBALDIEV
