Respýblikalyq mańyzy bar «Úsharal-Dostyq» tasjoly jabyldy, dep habarlaidy "Ult aqparat".
«QazAvtoJol» UK AQ Almaty oblystyq filialy men «Qazaqavtojol» JShS Almaty oblystyq filialynyń habarlaýynsha, 17 qarasha saǵat 12:10 bastap aýa raiynyń qolaisyzdyǵyna bailanysty «Úsharal-Dostyq» respýblikalyq avtojolynda (84-184 shaqyrym aralyǵy) barlyq avtokóliktiń júrýine tyiym salyndy.
Almaty oblysy tótenshe jaǵdailar departamenti qysqy jolda qaýipsizdik erejelerin saqtaý kerektigin eskertedi.
Júrgizýshiler myna talaptardy qatań saqtaýy tiis:
- aýa raiynyń ózgerýin, meteorologiialyq málimetterdi baqylaý, aýa raiynyń nasharlaýy jáne avtojoldarda avtokólik qozǵalysyna shekteýler engizý kezinde jolǵa shyqpaý;
– ár kólikte mindetti túrde shuǵyl jaǵdaida qutqaratyn zattar - dánekerleý shamy, arqan, dóńgelekterge arnalǵan shynjyr, kúrek, parafindi shyraqtar, sondai-aq jyly kiim, birinshi kezekte qajetti zattar, tamaq jáne sý qory bolýy tiis;
- jazǵy shinany qysqy dóńgelekke ýaqytyly aýystyrý qajet;
- eger siz boran nemese qatty aiaz kezinde jolda bolsańyz, kóligińiz eldi mekennen alys jerde nemese sizge tanys emes jerde toqtap qalsa, kólikte qalyp, jolda basqa kólikti kútip nemese «101» jáne «112» nómiri arqyly kómek shaqyrý qajet.
