Almaty oblysy ákiminiń birinshi orynbasary Lazzat Turlashov Taldyqorǵan qalasyndaǵy qurylysy tolyq aiaqtalmaǵan, sondai-aq, jańadan bastalǵan nysandardy aralap shyqty. Árine, kóńil tolar kóptegen tabys bar. Arasynda syn-eskertpe estip, jumys qarqynyn tezdetýge ýáde etken merdigerler de kezdesti.
Oblys ákiminiń birinshi orynbasary eń aldymen Qaratal shaǵynaýdanyndaǵy qurylysy 1993 jyly toqtap, sodan beri qańyrap bos turǵan kópqabatty ǵimaratqa bas suqty. Atalǵan nysandy el igiligine berý úshin buǵan deiin de talai ret joba-jospardyń jasalǵanyn bilemiz. Birde qonaqúi, endi birde ákimshilik mekemeler ornalasatyn ǵimaratqa ainalmaqshy bolǵan. Ókinishke qarai, qujattandyrý, taǵy da basqa kedergilerdiń kesirinen ýáde oryndalmai kelgen edi. Endi sol 9 qabatty nysan Taldyqorǵan qalalyq meditsinalyq kolledjiniń jataqhanasy bolyp qaita jańǵyrtylatyn boldy. Bul - eń sońǵy sheshim. Biylǵy oqý jylyna deiin jóndeý jumysy tolyq aiaqtalatynyn Lazzat Mahatuly senimmen aitty. Demek, jataqhananyń jetispeýshiliginen páter jaldap turatyn bolashaq mamandardyń qiynshylyǵy osy nysannyń iske qosylýymen sheshilmek. Sondai-aq, ǵimarattyń ainalasyndaǵy at shaptyrym aýmaqty alyp jatqan bos jer abattandyrylyp, stýdentterdiń bos ýaqytynda kóńildi demalys uiymdastyratyn orny bolmaq. Ǵimarattyń irgesindegi akvaparktiń ainalasyna da jóndeý jumysy júrgizilmek.
Lazzat Mahatuly kelesi kezekte nazar aýdarǵan nysandardyń biri – Taldyqorǵan qalasynda jańadan salynyp jatqan, internet jelisine qosylǵan, kópsalaly qyzmet kórsetýge arnalǵan aialdama. Biyl qala boiynsha árbiriniń quny 8 million teńge turatyn 10 aialdama salynady. Qazir onyń beseýiniń qurylysy aiaqtalyp, jolaýshylar kóligin kútetin júrginshilerdiń alǵysyna bólenýde. Qalǵandary jyl sońyna deiin el igiligine asyrylady. Biraq aialdamany aralap shyqqan tekserýshiler ondaǵy keibir kemshilikterdi de baiqap qaldy. Lazzat Mahatulyna aialdamalardyń ishki bezendirý jumysy unamady. Óitkeni, ishki bezendirýge qoldanylǵan materialdardyń deni kúńgirt túspen boialǵan. Aialdamanyń ishi adamdarǵa sergektik syilaityn ashyq tústi bolǵany jón emes pe? «Turǵyn úi qurylys jinaq banki» salymshylarynyń qarjysy boiynsha boi kótergen 5 jáne 16 qabatty turǵyn úilerdiń qurylysy men qurylys jumysy byltyrdan beri jalǵasyp kele jatqan kottedjdi qalashyqtan da kemshilikter baiqaldy. Bul nysandaǵy qurylys jumysy sapaly júrgizilip jatqanymen qarqyny baiaý. Qurylystaǵy kemshilikterdi merdiger kompaniia ókilderine kórsetip shyqqan Lazzat Mahatuly qurylys jumysy osy qarqynmen júrgizilse, turǵyn úidi belgilengen ýaqytta bitire almaitynyn synǵa aldy. Biraq merdigerler bul úilerdi sáýir aiynda bitiretinderin aityp, ýáde berdi.
Lazzat Mahatuly taǵy bir nazar aýdarǵan másele – Taldyqorǵan qalasyndaǵy jeke kompaniialardyń qarjy qosýymen salynyp jatqan kópqabatty úilerdiń jaǵdaiy boldy. Árine, bul úilerdi jeke qurylys kompaniialary óz qarjysy esebinen salyp jatqandyqtan, qurylys sapasynan kiná tabý qiyn. Sáýleti de, saltanaty da, jobasy da kelisip tur. Biraq Lazzat Mahatuly:
– Bul úiler salynyp bitkennen keiin tek úidiń mańaiyn ǵana tazalap, is bitti dep ketip qalmaý kerek. Sol úidiń ainalasyndaǵy aýmaq abattandyrylatyn bolsyn. Sondyqtan, tiisti mekemeler únemi qadaǵalap otyrýy kerek, – dep qalalyq mekeme basshylaryna tapsyrma berdi.
Qaladaǵy on shaqty nysandy aralaǵan oblys ákiminiń birinshi orynbasary tekseris sońynda jýrnalister qoiǵan suraqqa jaýap berip, qurylys salasynyń aldaǵy ýaqyttaǵy jai-kúii týraly maǵlumat berdi.
Qajet Andas
