Almaty oblysynda 11 qoidy urlaǵan baqtashy trassada politseilerge ustaldy, dep habarlaidy "Ult aqparat".
Almaty oblystyq Politsiia departamenti baspasóz qyzmetiniń málimetinshe, Eskeldi aýdany Aqyn Sara aýylynyń ýchaskelik politsiia inspektory Meiir Eskendirov pen Qońyr aýylynyń ýchaskelik politsiia inspektory Dastan Madikenov ákimshilik aýmaqty aralaý kezinde «Almaty-Óskemen» avtojolynyń boiynda «Aýdi» markaly kólikti toqtatyp, mal urysyn aiǵaqzattarmen ustady. Tekserý barysynda tártip saqshylary kólikten eki qoi eti men 5 qoidyń basyn tapqan. Et ónimderiniń tiisti qujattarynyń joq ekenin anyqtaǵan politseiler mán-jaidy anyqtaý úshin kúdiktini jáne kólikti aýdandyq politsiia bólimine jetkizgen. Tekserý barysynda kólikten tabylǵan 5 qoidyń sharýa qojalyqtarynyń birinen urlanǵany áshkere boldy.
«Atalǵan derek boiynsha QR Qylmystyq kodeksi 188-1 babyna sáikes sotqa deiingi tergeý amaldary júrgizilýde. 34 jastaǵy kúdikti qamaqqa alyndy. Aiǵaqzattar tárkilenip, is materialdaryna tirkeldi. Bultartpas aiǵaqtardan keiin kúdikti qylmysyn tolyǵymen moiyndady. Kúdiktiniń osyǵan uqsas ózge de qylmystarǵa qatysy bary tekserilýde»,- dedi Eskeldi aýdany PB bastyǵynyń ýaqytsha mindetin atqarýshy politsiia maiory Nurjan Seisenbekov.
Politsiia taratqan aqparatqa sáikes, 34 jastaǵy kúdikti sharýa qojalyqta mal baǵyp júrip, óz jumys berýshisinen 11 qoidy qoldy qylǵan. Kelesi kúni 22 qarashada 5 qoidy soiyp, etin satyp jibergen. Taǵy da 2 qoidyń etin satý maqsatynda oblys ortalyǵyna kele jatqan jolda qolǵa túsken. Qalǵan 4 qoi tárkilenip, zańdy iesine qaitaryldy.
