Almaty oblysy Shonjy aýylynda salynyp jatqan dene shynyqtyrý-saýyqtyrý kesheniniń shyǵyny anyqtaldy. Óńir basshysy Amandyq Batalov ortalyq kommýnikatsiialar qyzmetinde bergen esebinde shyǵyn kólemi shamamen 70-75 mln teńgege baǵalady, dep habarlaidy "Ult aqparat".
Almaty oblysynyń ákiminiń aitýynsha Elbasy tapsyrmasymen qazir ár aýdanda dene shynyqtyrý-saýyqtyrý kesheni salynyp jatyr.
«Bul baǵytqa biýdjetten qarjy qarastyrylǵan. Sondai nysandardyń biri Shonjy aýylynda salynýda. Alaida merdiger kinásinen shatyr qulady. Biz ol jerge komissiia jiberdik. Qazaq qurylys jáne sáýlet ǵylymi zertteý institýtynyń mamandary sheshim shyǵardy. Olar jobalyq sheshimdi buzǵan. Metall qurastyrmalardyń túiisken jerlerin tómendetip jiberip, shatyr qulady. Qaita oqiǵa ǵimarat salynyp jatqan kezde boldy. Mundai olqylyqtarǵa jol bermeý kerek. Avtorlyq jáne tehnikalyq qadaǵalaý ókilderi jiti baqylyp otyrý kerek», - dedi Amandyq Batalov.
Sondai-aq oblys basshysy qurylys jumystaryn Túrkistan oblysyndaǵy Saryaǵashtan utyp alǵanyn, al jobalaýshy mekeme Jezqazǵan qalasynan ekenin atap ótti.
«Men olardy jumys istei almaidy demeimin. Biraq mundai isti qolǵa alǵan soń sapaly jasaý kerek. Másele quny – olar bárin ózderi qalpyna keltirý kerek. shyǵyndardy eseptedik. Shamamen 70-75 mln teńge. Biz olarǵa jumysty ýaqytynda aiaqtaý kerek ekenin eskerttik. Eger olar nysandy belgilengen merzimde aiaqtamasa aiyppul salynady. Odan keiin mundai jaýapsyz merdigerdiń mundai jumystarǵa múldem tartpaý týraly másele kóteretin bolamyz», - dedi óńir basshysy.
Esterińizge sala ketsek, Uiǵyr aýdanyndaǵy Shonjy aýylynda salynyp jatqan sport kesheninde úshinshi bloktiń shatyryn jaýyp jatqanda metall ferma qulady. Qulaǵan blok aýmaǵy – 1058,4 sharshy metr. Zardap shekkender men qaza bolǵandar joq.
