Almaty oblysynda kórshisiniń balasyn urlap, ony jertólelerdiń birinde zorlaǵan er adam ómir boiyna bas bostandyǵynan aiyryldy, dep habarlaidy "Ult aqparat" oblystyq sottyń baspasóz qyzmetine silteme jasap.
Almaty oblysynyń qylmystyq ister jónindegi mamandandyrylǵan aýdanaralyq sotynyń málimetinshe, 2020 jyldyń 7 naýryzynda N. esimdi er adam mas kúide kórshisiniń kishketai balasyn urlap ketken. Balanyń qarsylyǵy men aiqaiyna qaramastan, aýzyn jaýyp, ony eshkim kórmeitin jeke turǵyn úidiń jertólesine aparyp, judyryqpen urǵan. Saldarynan bala esin joǵaltyp, dármensiz kúide, zorlyq-zombylyq pen jynystyq áreketke ushyrady.
Sotta sottalýshy aiypty moiyndamady, árekettiń dáleldenbeýine bailanysty ózin aqtaýdy surady.
Sot otyrysynda memlekettik aiyptaýshy men jábirlenýshiniń zańdy ókili sottan er adamdy Qylmystyq kodekstiń 125-baby 2-bóligi 5-tarmaǵy,120-babynyń 4-bóligi, 121-babynyń 4-bóligi boiynsha kináli dep tanýdy jáne ómir boiyna bas bostandyǵynan aiyrý túrinde jaza taǵaiyndaýdy surady.
Sottalýshynyń kinási qylmystyq is materialdarymen, kýágerlerdiń aiǵaqtarymen, sot-saraptamalyq zertteýlerdiń nátijelerimen dáleldendi.
Sondyqtan sot jaza taǵaiyndaý kezinde qylmystyń asa aýyr sanatyna jatatynyn, qylmystyń sipatyn, sottalýshynyń jeke basyn, onyń ishinde qylmys jasaǵanǵa deiingi jáne odan keiingi minez-qulqyn, jaýapkershilik pen jazany aýyrlatatyn mán-jailardy eskerdi.
«Sot ony Qylmystyq kodekstiń 125-baby 2-bóligi 5-tarmaǵy , 120-baby 4-bóligi, 121-baby 4-bóligi boiynsha kináli dep tanydy jáne oǵan qylmystyq-atqarý júiesiniń tótenshe qaýipsiz mekemelerinde jazasyn ótei otyryp, ómir boiyna bas bostandyǵynan aiyrý túrindegi túpkilikti jaza taǵaiyndady», - dep habarlady Almaty oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
Sot úkimi zańdy kúshine engen joq.
